Segon la tradicion de la Val d’Aran, lo primièr de genièr, quand doas personas se rescontran, se saludan en se disent “Bon jorn des aninòs!”. Lo primièr qu’o ditz a drech de se far convidar a beure un còp per l’autre o de recebre d’el qualque sòu.
 
Fa qualques annadas, quand aquela tradicion èra plan viva, la jornada èra plan trevada per las carrièras e las plaças de totes los vilatges d'Aran. Los enfants anavan vesitar lors pairins per lor desirar una bona annada en tot cantar la cançoneta:
   
Alavetz, lo pairin respondiá en tot pagar al filhòl las estrenas, qu’en aranés lor dison “aninòs”.
 
Profecham tanplan de l’ocasion per demandar los “aninòs” a tot lo mond que nos legisson. Jornalet es possible gràcias al sosten economic e jornalistic dels legeires e benevòls, e per tant vos grandmercejam de nos sosténer en venent sòci dels Amics de Jornalet o ben de l’associacion ADÒC. Contribuiretz a far un mèdia mai independent e de melhora qualitat. Podètz tanben far un don sus paypal.me/jornalet.
 
 
Sèt ans de Jornalet
 
Tanben la còla de Jornalet desiram una bona annada als legeires d’aqueste jornal. Un an especial, qu’aqueste jornal aurà complit sèt ans.
 
Lo sèt es totjorn un numèro especial per Occitània e per aquela rason Jornalet vòl festejar son seten anniversari amb sos legeires d'un biais especial. D'un caire, volèm menar a bon tèrme dos concorses literaris: lo de las minutinas e lo prèmi al melhor article d'opinion. D’autre caire, publicarem a la fin de genièr una revista de papièr que contendrà una seleccion dels melhors articles de 2018.
 
Avèm tanben pensat d'èsser presents per Occitània tota. Avèm un fum d'idèas e tanben d'enveja per collaborar amb los eveniments occitanistas del país, e doncas sètz pregats de nos escriure e de nos prepausar d'organizar quicòm en cò vòstre, o de nos convidar a participar activament a un eveniment qu'auretz organizat.