Diluns passat, lo govèrn cuban faguèt la presentacion formala de la còla de negociacion entre lo govèrn colombian e la guerrilha de las Fòrças Armadas Revolucionàrias de Colómbia (FARC). Las delegacions s’amassèron al Palais de las Convencions de L’Avana (Cuba), ont comencèron dètz jorns de contactes per establir un encastre de negociacion.

La delegacion del govèrn colombian es presidida per l’èx-vicepresident e èx-ministre de l’Interior, Humberto de la Calle, qu’a reïterat l’oposicion del govèrn a un cessament del fuòc bilateral prepausat per la guerrilha. Las FARC i son representadas per sièis delegats, amb lo comandant Iván Márquez en tèsta. Lo quite Márquez expliquèt que la reünion precedenta en Cuba serviguèt a bastir “una causa semblabla a las nòrmas de foncionament de la còla”.
 
Las expectativas sus aquela negociacion son moderadament optimistas, pr’amor que pòdon representar la fin de cinquanta dos ans de conflicte, e mai se lo darrièr ensag de patz, de 1999 a 2002, fach a l’iniciativa del president Andrés Pastrana, capitèt mal; d’un costat, perque l’ofensiva militara foguèt fòrça intensa e, d’un autre, perque las FARC quitèron pas de far de sequestracions.
 
Aqueste còp, las doas parts negociaràn una agenda de cinc ponches, que compren lo desvolopament agrari integral, los gatges per l’exercici de l’oposicion politica, la fin del conflicte, la lucha contra lo narcotrafec e la compensacion a las victimas. L’agenda se pachèt lo mes passat en Norvègia, país que, amb Cuba, garentís e facilita las negociacions. Veneçuèla e Chile participan tanben al procès, en qualitat d’acompanhaires.