capçalera campanha

Actualitats

InternacionalPoliticaSocietat

Virada masclista dins l’estat espanhòl

La justícia confirma la libertat condicionala de cinc violaires en reünion del temps qu’en Andalosia se met sus la taula de las negociacions la derogacion de la lei que protegís las femnas de la violéncia masclista

Creis l’indignacion feminista dins l’estat espanhòl del temps que la justícia e la política prenon de decisions de mai en mai masclistas. D’un caire, son en libertat condicionala los cinc assalhidors condemnats en abril passat a 9 ans de preson per aver violat ensems una femna, de l’autre, los partits drechistas son a pachar amb l’ultradrecha de cambiar las leis que protegisson las femnas contra la violéncia masclista per tal de daverar lo govèrn regional d’Andalosia.
 
 
Cinc violaires en libertat
 
L’afar nomenat “La Manada“ (l’Ardada) es dempuèi longtemps una rason d’indignacion dins tot l’estat espanhòl. En abril passat los jutges absolguèron cinc òmes del viòl collectiu d’una gojata de 18 ans, en los condemnant solament per abús sexual. Segon lo verdicte, dins los imatges de l’agression, la joventa mòstra pas de resisténcia. Aquela senténcia causèt de manifestacions nombrosas dins las principalas vilas de tot l’estat. Los cinc assalhidors, dont un militar e un gàrdia civil, foguèron condemnats per un delicte contunh d’abús sexual, a 9 ans de preson e a la pèrda del drech de vòte pendent lo temps de la pena. Mas foguèron absolguts dels delictes d’agression sexuala, de panatòri amb violéncia o intimidacion e d’un delicte contra l’intimitat.
 
Ara, la cort de justícia de Navarra a decidit de confirmar la libertat condicionala dels cinc condemnats, que quitèron la preson lo 22 de junh de l’an passat en pagant una caucion de 6000 èuros. Los procuraires e la partida civila an insistit per que sián tornarmai encarcerats. Mai que mai se prenèm en compte qu’un d’eles ensagèt de renovelar son passapòrt.
 
Al delà de las protèstas feministas e socialas, se pausa de questions sus la dobla mesura de la justícia espanhòla que ten en preson preventiva dempuèi mai d’un an los presonièrs politics catalans.
 
 
La violéncia masclista dins lo debat politic en Andalosia
 
Mentretant en Andalosia, lo Partit Popular e Ciutadans cèrcan lo sosten de l’ultradrechista Vox per poder crear un govèrn regional. Après aver pachat la composicion del burèu del parlament, ara Vox exigís la derogacion de la lei andalosa contra la violéncia de genre aprovada lo 1r d’agost passat a l’unanimitat dels deputats regionals. De soslinhar qu’Andalosia es la region de l’estat amb mai de crimes masclistas. Entre las 47 femnas assassinadas en 2018 dins tot l’estat per lors companhs o èx-companhs, 12 èran andalosas.
 
Ara, lo Partit Popular prepausa a Vox d’ajudas tanben pels òmes qu’ajan patit de violéncias e parla tanben de “la manca de defensa” dels òmes davant las femnas.

 
 

 
 

 

 

 
 


abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

francesc palma
3.

Quan ho comparam amb los presos catalans, que non los han daissat ni un jorn per anar veire sa familia per Nadal, es d'un regim coma lo neofranquisme.

  • 6
  • 0
Anta Bèlvéser
2.

"Ara, lo Partit Popular prepausa a Vox d’ajudas tanben pels òmes qu’ajan patit de violéncias e parla tanben de “la manca de defensa” dels òmes davant las femnas."

Compreni pas aquò. La rèsta de l'article parla de violéncias ditas masclistas, aquò rai, coneissi pas les afars e es probablament justificat.
Mes aquò? D'òmes que son batuts, n'i a. N'i a mens que de femnas, cèrtas, mes n'i a (1 per 10 femnas e encara, es tabo donc benlèu n'i a mai qu'aquò). E aqueles paures bogres an pas res de res per se defendre, la causa es negada politicament e mediaticament. E socialament? Fa rire las gents. Es pas un òme vertadièr perqué un òme vertadièr se daissa pas batre per sa femna, òc!
Considerar qu'una femna e sonque una femna pòt èstre victima, aquò es de sexisme.
Sexisme contra las femnas, eternalas victimas qu'an besonh d'èstre mai protegidas, coma s'eran mainatges. E que pòdon pas èstre maissantas perqué son puras coma d'àngels.
Sexisme contra les òmes tanben que pòdon pas èstre victimas que d'autres òmes.
Perque? Perqué les òmes son abitualament mai grands, mai fòrts? E l'aspècte psicologic d'una relacion?

Doncas, la rèsta de la politica de Vox es benlèu masclista, mes d'ajudas pels òmes en situacion de fragilitat? Vesi pas çò qu'a de masclista.

"Boys don't cry"

  • 3
  • 6
Jiròni B. Sent Liunard (de Noblac)
1.

Quau tristessa...

  • 4
  • 0

Escriu un comentari sus aqueste article