Dijòus passat, lo cònsol màger de Nàpols, Luigi de Magistris, anoncièt que permetriá qu’intrèsse dins lo pòrt de sa vila la nau Sea Watch 3 per desembarcar 32 migrants salvats davant la còsta de Libia. Lo vaissèl es estat durant 14 jorns blocat sus la mar après aver socorreguts los naufragièrs.
 
Amb aquel gèst, de Magistris a jonch lo creissent nombre d’elegits italians que refusan d’aplicar lo decret de seguretat e d’immigracion del ministre de l’Interior, l’ultradrechista Matteo Salvini. “Daissar de personas e d’enfants al mièg d’una mar freja e auratjosa es pas solament una causa indecenta, immorala e esglasianta: es un crime. Espèri qu’aquel naviri se sarrarà del pòrt de Nàpols perque, a la diferéncia de çò que ditz lo govèrn, lançarem una operacion de salvament e permetrem qu’intre al pòrt. Serai lo primièr a dirigir lo salvament”, çò diguèt de Magistris.
 
La velha, la lei de Salvini foguèt tanben rebutada pel cònsol màger de Palèrme, Leoluca Orlando. “Es un tèxt inuman perque viòla los dreches umans, e criminalizaire pr’amor que fa venir illegalas de personas que son legitimament sus nòstre territòri”, çò assolidèt.
 
Demest los autres cònsols màgers qu’an refusat d’obesir a l’inumana lei de Salvini, cal soslinhar lo de Florença e sustot lo de Parma, dissident del Movement 5 Estelas.
 
Salvini apèla al respècte de la lei e menaça d’accions legalas per destituir los cònsols dissidents. Curiosament, el meteis en 2016 cridava los elegits locals a desobesir a la lei sus las unions civilas que permetiá lo maridatge per totes, “per una question de consciéncia”, çò assegurava.
 
Dempuèi sièis meses, Salvini a reüssit a blocar gaireben totalament l’arribada dels migrants dins lo país. Una mesura qu’an saludada los elegits pus conservators.

 
 

De Magistris... pic.twitter.com/1VzujMuZoj

— VIOLA (@VIOLA_MARTELLA) 4 de gener de 2019

 
 

De Magistris antifascista pic.twitter.com/u31TGKsaaK

— Luca Greco (@LucaGre78286032) 3 de gener de 2019