Lo cap del PKK considèra que l’accion “a capitat”. Lo govèrn turc permetrà l’usatge de la lenga curda als tribunals e prepausa de manténer de convèrsas amb Öcalan dins l’avenir. La cauma de la fam voliá far pression sus Ankara per que levèsse las restriccions a la lenga e per que melhorèsse las condicions d’Öcalan dins la preson.

Los presonièrs curds qu’èran en cauma de la fam dempuèi setembre passat (aperaquí 700) an quitat la protèsta la dimenjada passada. La decision l’an presa après que lo cap del Partit dels Trabalhadors de Curdistan (Partiya Karkerên Kurdistanê, PKK), Abdullah Öcalan, lor aja demandat que daissèsson la cauma. Öcalan, en un comunicat emés pel sieu fraire, a dich que “la cauma aviá capitat lo sieu objectiu” e qu’aviá pas de sens de contunhar en metent en risc las vidas dels caumaires, que la santat de qualques unes èra en una situacion limit.
 
L’apèl d’Öcalan, que complís una condemnacion dins la preson turca d’İmralı, a coïncidit amb de timids senhals de dobertura de la part d’Ankara. D’un costat, lo govèrn turc a anonciat fa doas setmanas que portarà al Parlament de Turquia una modificacion legala per permetre l’usatge de la lenga curda dins los tribunals. Aquò èra una de las demandas dels caumaires, malgrat qu’Ankara assegura que la mesura èra ja prevista en setembre passat.
 
De l’autre, divèrses mèdias locals interprètan que la demanda d’Öcalan tanh a la possibilitat que se comence un nòu procès de negociacions entre Turquia e lo PKK. Lo jornal numeric curd Rudaws’i referís, e parla de contactes recents entre lo cap de la guerrilha curda e los servicis secrets turcs. Diluns passat, lo quotidian turc Zamancitava lo ministre de la Justícia de Turquia, Sadullah Ergin, en disent que “i aurà, segon el, de convèrsas” dins lo futur amb Öcalan, e mai s’a pas precisat cap de forma ni quina portada auràn.
 
 
Contra l’isolament d’Öcalan e en favor de la lenga
 
La cauma de la fam visava de far pression sus lo govèrn de Turquia per que metèsse un ponch final a l’isolament d’Öcalan dins la preson d’İmralı e per que levèsse las restriccions a l’usatge del curd dins los sistèmas educatiu e judicial. Una granda part dels presonièrs qu’èran en cauma de la fam èran de sòcis del PKK. Qualques deputats de l’unic partit curd amb de representacion dins lo Parlament turc, lo BDP, tanben avián jonch la protèsta.
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.