Lo govèrn francés vòl ara resòlver la crisi dels Gilets Jaunes amb mai de repression. Lo primièr ministre, Édouard Philippe, vòl aplicar doas mesuras: una es que portar la cagola siá un delicte e l’autra es sancionar los que participaràn a de manifestacions non declaradas.
 
Philippe o anoncièt passat dins una entrevista a la cadena TF1: “Lo govèrn es favorable al completatge de nòstra lei, a l’adopcion d’una lei nòva que permetrà de sancionar los que respectarián pas aquela obligacion de declaracion, los que participarián a de manifestacions que son pas declaradas”. Lo primièr ministre o justificava en disent que “cal preservar la libertat de manifestar en França e cal sancionar los que vòlon enfrànher aquel drech de manifestar”.
 
Atal, Philippe declarèt que pels manifestants “cagolats, uèi [èra] una contravencion, deman aquò [deviá] èsser un delicte”. E mai exigiguèt que foguèsson los “esclapaires” que “[paguèsson] pels damatges que son causats”. La lei poirà èsser debatuda a l’Assemblada Nacionala francesa “tre lo començament del mes de febrièr”.
 
En mai d’aquò, lo primièr ministre lancèt aquel messatge: “Aqueles que dison que 50 000, 100 000 personas per carrièras bastan per destituir lo president e per invalidar lo resultat de las eleccions s’inscrivon dirèctament contra nòstras institucions: auràn pas jamai rason dins nòstre país”.
 
 
Anóncia 80 000 policièrs per dissabte que ven
 
Per quant a la novena dimenjada de mobilizacions prevista per dissabte venent, lo primièr ministre a promés un dispositiu de 80 000 fòrças de polícia. “Sèm estacats a l’òrdre public e avèm pres la decision de mobilizar en massa de fòrças d’òrdre dissabte que ven e i aurà de nombrosas interpellacions”, çò anoncièt. De fach, dempuèi lo començament de las manifestacions dels Gilets Jaunes i a agut mai de 1000 condemnacions e 5600 gardas a vista, segon las donadas que precisèt Philippe.