Lo devenir de la vinha
 
L’estanquet mesadièr de Fasètz la Lenga en Cabardés se debanarà aqueste dimars 15 de genièr, a 6 e mièja del vèspre, al Priorat d’Argon. Robèrt Curbières e sa filha Èlsa, del Domeni de la Ventalhòla a Ventenac de Cabardés (en cultura biologica), parlaràn de la situacion actuala dels vinhairons e de las perspectivas del mestièr e del consum de vin.
 
L'associacion prepara pel mes de març tanben sa quinzenada annadièra, dins de condicions malaisidas : l'aigat d'octòbre a rendudas inutilizablas las doas salas d'espectacle de Vilagalhenc. Mas, es pas question de daissar tombar l’accion culturala; aquò empacharà pas de seguir Man trobat (dijòus 14 de març, a Puègnautièr), lo Barrut (dissabte 16/03, a Mossolens, ont l’associacion organizarà sa quina annadièra lo divendres 15 de febrièr) o Moussu T (lo dissabte 23/03, a Ventenac). Tornarem lo moment vengut sul programa detalhat de la manifestacion.
 
 
Contes per pichons e grands
 
Divendres 25 e dissabte 26 de genièr, l’Institut d’Estudis Occitans d’Aude organiza las Ivernalas de Cabardés a Puègnautièr, amb dos moments de conte (sala Na Loba) e una taulejada.
 
Primièr rendètz-vos, dedicat al jove public: lo divendres a 6 oras e mièja del vèspre ont Malika Verlaguet dirà Losmormolhsdelcodolet: “De peisses parlan: o sabiái pas abans de m’arrestar en riba del riu e de prene un codolet dins la man, un codolet lis e doç. E çò que me contèt, l’ai gardat amb ieu… Los contes an seguit lo camin de l’aiga e, per la boca del peis ont se mesclan las lengas, convidan a se daissar portar pel corrent dels imaginaris.”
 
Segond rendètz-vos: lo dissabte 26, a 7 oras del vèspre, amb Florant Mercadièr e sos ContesdeGaronaentredoasaigas: de Pirenèus fins a la Mar Nòstra, se crosaràn de princessas de las Espanhas, de farfadets trufets, de nòtas de musica, la posca dels camins, de barcas sus l’aiga… Sus l’empont, Florant Mercadier se fa tanben musician e s’acompanha amb la sansònha, la bodega o l’armonica… per balhar mai de ritme al raconte e seguir las gabarras dels sòmis.
 
Seguirà, a 8 e mièja del ser, un repais convivial a l’entorn d’una blanqueta de vedèl que farà lo ligam amb la manifestacion de las Ampelofoliás de Cabardés[1].
 
 
Trufas negras, vins de Cabardés e produits còrses
 
Tresena manifestacion: las Ampelofoliás de Cabardés que celèbran la trufa negra e los vins de Cabardés. La manifestacion d’ongan marcarà a l’encòp los 20 ans de la version ivernala del rendètz-vos e los 20 ans de la reconeissença de l’AOP Cabardés.
 
Tre lo divendres de ser, a Montoliu, se jogarà una pèça a partir de tèxtes culinaris de Margarida Duràs.
 
Lo dissabte de matin, Mirèlha Braç animarà un obrador de cosina de la rabassa qu’aficha complet dempuèi bèl brieu e ont se prepararàn de burre e de fetge gras trufats, una lesca al lard de Colonnata trufat, una brolhada, un suprèm de polalha, de formatge e una doçor: lo tot enrabassat. Pensatz de vos inscriure per l’edicion de... 2020! Lo dissabte de ser, venèm de o dire, rendètz-vos a la serada de Puègnautièr.
 
Puèi, dimenge 27 de genièr, aquò es lo grand rendètz-vos de Mossolens, de 10 oras del matin a 5 oras del vèspre: mercat del terrador e dels artisans (l’IEO-Aude ten un taulièr); doas mòstras de fotografias; vesita del conservatòri truficòla; mòstra de cèrca de trufas e de poda de la vinha; concors de recèptas trufadas amb calandres del Centre d’Aprendissatge de Lesinhan e del licèu d’ostalariá de Carcassona; senhaletica bilingüa francés-occitan; de qué manjar trufat (e per pas car): meleta, entrepans, lescas, sopa coja-castanhas trufada; tibanèl gastronomic amb Jiròni Ryon, cap estelat del restaurant La Barbacane a la Ciutat de Carcassona; animacions pels mainatges; musica per carrièras amb Tarabastar al repertòri festiu occitan e Convers’Band; chancaires…
 
A doas oras e mièja del vèspre, vendrà lo moment tant esperat del mercat de las rabassas. De rabassas  que se vendon a l’unitat e que son verificadas abans la mesa en venda pels tecnicians de la Cambra d’Agricultura: una garentida de primièra e de qualitat pels crompaires.
 
L’originalitat bèla de l’edicion de 2019 de las Ampelofoliás es la participacion d’una delegacion còrsa que vendrà presentar vins, carnsaladariás e fromatges de l’illa. Se faràn de tastas crosadas entre los vins de Corsega, de Cabardés e de Lengadòc.
 
 
 
 
Alan Roch