Los pompièrs d’Aran an enfin contrarotlat un incendi que dempuèi dimenge passat a cremat 215 ectaras de pasturas dins lo terçon d’Arties e Garòs.
 
L’incendi es estat de fòrça mal escantir completament a causa de l’orografia del terren e del freg. Los pompièrs d’Aran an trabalhat mai que mai amb de mejans aerians ajudats pels pompièrs de la Generalitat de Catalonha. Cap de zòna abitada es pas estada en perilh, mas ièr los efectius deguèron trabalhar pus fòrt e dur car lo vent e la nèu qu’arriban aurián complicadas las causas.
 
Los darrièrs 25 jorns dins los Pirenèus son estats extraordinàriament secs, mai que mai dins las regions pus nautas, çò que fa propagar lo fuòc amb fòrça intensitat. Pasmens, lo fuòc un còp amortat torna pas nàisser car la tèrra es umida.
 
Lo sindic d’Aran, Carlos Barrera, a mercejat totes los servicis engatjats dins l’escantiment de l’incendi.