All the Countries We’ve Ever Invaded (Totes los païses qu’avèm agut ocupat) es lo títol d’un libre publicat ongan. L’autor, Stuart Laycock, i respond la question seguenta: “Quantes païses a ocupat la Grand Bretanha?” Après metre en examen l’istòria dels gaireben dos centenats d’estats de l’ÒNU, en cèrca de possiblas incursions o invasions britanicas, Laycock es arribat a una conclusion estonanta: sonque vint e dos païses actuals an esquivat la dominacion britanica.

La lista completa dels estats jamai ocupats per la Grand Bretanha es aquesta: Andòrra, Bielorussia, Bolívia, Burundi, la Ciutat del Vatican, Còngo, la Còsta d’Evòri, Guatemala, las Illas Marshall, Quirguizstan, Liechtenstein, Luxemborg, Mali, Mónegue, Mongolia, Paraguai, São Tomé e Príncipe, la Republica Centreafricana, Suècia, Tatgiquistan, Chad e Ozbequistan.
 
La rèsta dels territòris, çò ditz l’estudi de Laycock, foguèron someses en qualque moment de l’istòria a l’orbita de Londres, siá per la fòrça militara, per la menaça, per una negociacion, o per un pagament... o ben mejançant de corsaris. Ça que la, de totes aqueles païses, sonque una part relativament petita foguèt integrada formalament a l’Empèri Britanic.
 
Lo jornal anglés The Telegraph a parlat amb l’autor del libre, qu’admet que se poiriá escriure d’òbras semblablas sus qualques autres estats, coma França, mas que la lista resultanta seriá mai corta: “Cresi que n’i a pas cap que pòsca superar la Grand Bretanha, e mai se los Estats Units comencèron mai tard e s’i consagrèron fòrça al sègle XX.”