Un an de mai, l’InÒc Aquitània a presentat la campanha de vòts “Bona Annada 2019!”. Coma cada an, se tracta d’afichar la lenga occitana amb lo messatge calorós de la “bona annada” adreiçat al public general, que conescan la lenga o pas, e de la far venir presenta dins la vida vidanta del país.
 
Lo visual d’ongan es lo resultat d’un trabalh de collaboracion entre l’InÒc e l’Escòla Superiora d’Art dels Pirenèus. Fòrça estudiants an prepausat de pistas de reflexion sul tèma de la “bona annada”, de l’occitan e de la cultura del país. Enfin, la creacion grafica finala es facha per l’estudianta Ana-Sophia Carpousis. Aquesta prepausa un prolongament de la reflexion d’arunan amb una aficha mai luminosa e acolorida que fa pensar a la gaietat d’un fuòc d’artifici; s’agís d’una representacion mai concreta de la socializacion de la lenga, de la convivialitat e de l’irradiacion culturala.
 
Aquela campanha existís dempuèi 2003 e cada an ten mai de partenaris, çò que la fa grandir, e rend de mai en mai presenta la lenga dins lo païsatge lingüistic d’Occitània. A l’ora d’ara, la campanha la sostenon lo CIRDÒC, l’ÒPLO, los conselhs departamentals dels Pirenèus Atlantics e dels Nauts Pirenèus e tanben las regions qu’an pres lo nom d’Occitània e de Nòva Aquitània.
 
 

Augan, desiratz la « Bona Annada » diferentament, mercés a l’InÒc Aquitània qui’vs prepausa de har la bona annada a l’entorn de vosautes dab un visuau qui pòrta un messatge simple e calorós en occitan.https://t.co/Lnyz3N21fCpic.twitter.com/Il4MpKLFUA

— InÒc Aquitània (@Institutoccitan) 31 de desembre de 2018