Los mètges andaloses identificaràn pas los migrants diches illegals per que pòscan èsser enseguits e expulsats. Atal o a anonciat lo Conselh dels Collègis de Mètges d’Andalosia en reaccion a l’iniciativa impausada per l’ultradrecha dins lo pache que menarà la drecha al govèrn regional. “Nosautres, coma mètges, devèm aculhir los pacients sens qu’impòrte se son d’immigrants o non”, çò a dich Emilio García de la Torre, president del Conselh. “Nosautres identificarem pas ni farem res contra cap de persona a causa de la color de sa pèl o de son apertenéncia politica”, çò a precisat segon Redacción Médica.
 
Lo govèrn regional d’Andalosia se constituirà après un acòrdi entre los dos partits drechistas (PP e Ciudadanos) amb l’ultradrechista Vox, qu’a reüssit a impausar qualques unas de sas proposicions, coma que los mètges identifiquen los immigrants “illegals” per que pòscan èsser perseguits e expulsats. La proposicion de Vox acceptada pels autres partits demanda als mètges “de collaborar amb la polícia a l’identificacion d’immigrants illegals per que pòscan èsser expulsats” e mençona especificament lo Conselh dels Collègis de Mètges d’Andalosia que l’acusa d’aparar l’immigracion irregulara; per tant, segon lo partit d’extrèma drecha Vox, “possedís la documentacion que cal per la percaça de 52 000 immigrants illegals mas la parteja pas amb la polícia”. Pasmens, García de la Torre remembra que se consagrarà solament “als afars medicals e a melhorar la santat dins la mesura de çò possible”.
 
A l’ora d’ara, lo Conselh dels Collègis de Mètges d’Andalosia garentís los suènhs medicals a las personas immigrantas en situacion irregulara e sens ressorsas en lor permetent d’accedir al sistèma public de santat d’Andalosia. D’efièch, en 2017 aculhiguèt 47 445 personas migrantas en aquelas condicions.
 
 
 

Vía @redaccionmedica. Los médicos responden a @vox_es sobre delatar inmigrantes: "No vamos a hacerlo". La identificación por parte de la Junta de Andalucía de los inmigrantes ilegales para su expulsión es una de las medidas que más ha llamado la atención https://t.co/OZ5sOmiLOupic.twitter.com/i1lSRkUren

— Paula Ericsson (@paulaericsson_) 10 de gener de 2019