La comuna de Lorda a consagrat l’an 2019 a Bernardeta Sobirós a l’ocasion del 175n anniversari de sa naissença e del 140n de sa mòrt. Long de tota l’annada se tendràn d’eveniments especials, de rescontres e d’omenatges organizats per la comuna e tanben pel santuari de Nòstra Dòna de Lorda, çò rapòrta France 3.
 
Atal, la vila rend ongan omenatge a la pastora que cambièt lo destin de la vila de Lavedan après afirmar qu’aviá vist qualques còps la verge amb qui auriá parlat en occitan. “Qu’ei important de perseguir era mesa en valor dera vila a travèrs eth destin d’excepcion d’aquera que siguec canonizada en 1933”, çò diguèt la consolessa màger de Lorda Josette Bourdeu.
 
De son caire, lo paire André Cabes, rector del santuari, precisa que per l’an Sobirós “s’agís pas de cedir ara temptacion deth business”. Segon el, la mission es sustot de guidar los pelegrins devèrs çò que venon cercar, qu’es mai que mai “d’esperança”. Per el, Bernardeta Sobirós contunha de tocar las gents 175 ans après sa naissença car ela representa “tot eth mond” e non pas una eroïna.
 
 
L’istòria
 
Bernardeta Sobirós aviá 14 ans e una santat plan fragila quand diguèt que li èra apareguda la verge 18 còps entre l’11 de febrièr e lo 16 de julhet de 1858, dins la tuta de Massavielha. Ela parlava d’una femna qu’aviá vista, e quand aviá demandat a aquesta qui èra, auriá respondut: “Que soi era Immaculada Concepcion”. Segon lo curat de la vila, èra impossible que Sobirós coneguèsse çò que voliá dire “Immaculada Concepcion” pr’amor qu’èra un dògma que lo papa veniá de promulgar e qu’aviá pas de devocion al país.
 
Las aparicions foguèron examinadas per la Glèisa catolica, qu’al començament manifestèt una cèrta prudéncia davant lo cas. Mentretant, Sobirós intrèt dins un convent a Nivèrns (ara en Borgònha Franca Comtat) ont moriguèt malauta a 35 ans.
 
La Glèisa catolica acceptèt las aparicions e 70 garisons miraculosas a Lorda e la ciutat venguèt lo centre de pelegrinatge mai important d’Occitània e un dels pus importants del Mond. L’8 de decembre de 1933, lo papa Pius XI canonizèt Sobirós coma Santa Bernardeta de Lorda. Sa fèsta se celèbra lo 16 d’abril a l’ocasion de l’anniversari de sa mòrt, mas en França se festeja lo 18 de febrièr, a l’ocasion de l’anniversari de las visions.
 
 
 
La lenga del país mespresada
 
Totes los escambis entre Bernardeta e la verge se serián faches en occitan, mas sonque doas afichas o ramentan modèstament.
 
D’un caire, i a un panèl dins la tuta de Massavielha jos l’imatge de Nòstra Dòna que cita las paraulas “que soi era Immaculada Concepcion”. D’autre latz, se tròba dins lo santuari un autre panèl que mençona una autra frasa en occitan que l’auriá dicha la verge: “Anatz béuer ena hont e v’i lauar” (escrich: “Anat béouè en a hount et vi laoüa”). Aquel panèl, plaçat al començament del sègle XXI, es traduch en fòrça lengas.