An extradit devèrs Itàlia Cesare Battisti. Trenta uèch ans après aver fugit la preson ont èra condemnat a perpetuitat per terrorisme, l’arrestèron dissabte passat en Bolívia. Dins los ans 1970 Battisti fasiá partida de la banda Proletaris Armats pel Comunisme (PAC), un grop armat d’extrèma esquèrra en Itàlia. Lo condemnèron a perpetuitat per la mòrt de quatre personas, pel murtre de doas d’elas e per complicat de murtre per las autras doas. El a totjorn rebutadas aquelas acusacions.
 
La justícia italiana lo recèrca dempuèi 1981 mas Battisti s’exilièt en Mexic, puèi en França, ont, gardian d’immòble e escrivan, beneficièt de la proteccion de la dicha doctrina Mitterrand, que refusava las extradicions per motius politics, fins en 2004, quand jos l’autoritat del president Chirac se decidiguèt de lo liurar a Itàlia.  Alara tornarmai fugiguèt, e finiguèt que se trobèt en Brasil, que reactivèt en decembre passat la perseguida contra el. Lo president Michel Temer ne signèt lo decret qualques jorns abans que Bolsonaro foguèsse investit president. Pasmens, la bona relacion entre lo ministre de l’Interior italian, Matteo Salvini, e lo president brasilièr Jair Bolsonaro a facilitat la detencion de Battisti. Los dos politicians ultradrechistas se son felicitats sus Twitter.
 

- Ministro da Itália fala sobre Battisti.
- Parabéns a todos no Brasil que estiveram envolvidos no caso, na pessoa dos Ministros da Justiça, Relações Exteriores e GSI.
- Jair Bolsonaro. pic.twitter.com/WnBTWLaiEj

— Jair M. Bolsonaro (@jairbolsonaro) 13 de gener de 2019

 

#Salvini: ringrazio il presidente @jairbolsonaro. È cambiato il clima nel mondo, altrimenti una conclusione del genere sarebbe stata impensabile fino a qualche tempo fa.
#Tg2Italiapic.twitter.com/TFWusMWc1b

— Matteo Salvini (@matteosalvinimi) 14 de gener de 2019

 
 
Mexic, França e Brasil
 
Fugitiu per d’unes, exiliat per d’autres, Battisti a viscut mièja vida dins la clandestinitat. En 1981, fugiguèt la preson italiana e demorèt en Mexic e puèi dins l’estat francés ont beneficièt de la doctrina Mitterrand, mas quand foguèt revocada deguèt fugir. Arribèt en Brasil en 2004 e lo detenguèron en 2007. Tres ans pus tard, obtenguèt l’asil del president Lula da Silva, que refusèt de l’extradir devèrs Itàlia e li donèt un passapòrt permanent. Dilma Rousseff confirmèt aquela mesura en argumentar qu’en Itàlia poiriá subir “de persecucion a causa de sas idèas”. Segon la lei brasilièra, los crimes de Battisti son prescriches dempuèi 2013. Pasmens, l’arrestèron en 2015 e tanben en 2017, en lo liberant puèi. Mas en decembre de 2018, lo president Michel Temer signèt lo decret d’extradicion de Battisti devèrs Itàlia. Lo detenguèron dissabte passat en Bolívia ont èra intrat illegalament, e l’an extraditat devèrs Roma.
 
“Fugiguèri e anèri en França e puèi en d’autres luòcs, tostemps de refugi en refugi. Contunhavi de viure per ma militància passada, e aquò es tanben una preson. A la diferéncia dels autres exiliats, ieu aviái tanben un exili interior”, çò contava Battisti als mèdias fa dos ans.
 
 
L’“atrapa” de la lucha armada
 
En aquela escasença diguèt publicament que tornariá pas jamai a la lucha armada perque foguèt un desastre. “Per combatre un movement cultural e social enòrme, lo sol biais de l’acabar èra qu’intrèssem dins la lucha armada [...] e tombèrem dins aquela atrapa”, çò disiá.
 
Divèrses intellectuals an manifestat contra l’extradicion de Battisti dont Gabriel García Márquez, Bernard-Henri Lévy, Daniel Pennac, Tahar Ben Jelloun, Valerio Evangelisti e tanben qualques activistas americans d’Amnestia Internacionala.

 
  

Je dénonce l'extradition de Cesare Battisti, avec la collaboration de la Bolivie d'Evo Morales, vers l'Italie, pays condamné par la Cour Européenne des Droits de l'Homme pour ses violations des droits à la défense et manquement à un procès équitable

— José Bové (@josebove) 14 de gener de 2019