Lo pòble amazigh festeja aquesta setmana l'an nòu. Ongan es 2969 e se festeja per tot lo territòri berbèr, es a dire Tamazgha, e tanben dins los territòris de migracion berbèra, dont Occitània. Amb aquelas celebracions los amazighs del Mond entièr defendon lors cultura e identitat e las defendon contra la desmembrança e l'invisibilizacion.
 
A l'escasença d'aquela celebracion, l'Ostau dau País Marselhés metrà a l'onor aquela cultura talament rica e divèrsa en mostrant la cultura shawi (en amazigh Išawiyen), originària de la region montanhòla d'Aurès de l'èst d'Argeria. Dins aquel sens se projectarà un filme rodat dins aquel dialècte amazigh. En mai d'aquò, se festejarà l'an nòu a la faiçon berbèra amb un bon repais a basa de berkokèsh, una mena de plat de pastas en forma de gròsses grans de coscós, e amb un concèrt de la cantadoira cabila Nadia Ammour que prepausarà un repertòri ric de cants berbèrs en cinc dialèctes, fruch de sos collectatges per Tamazgha tota.
 
Rendètz-vos dijòus venent a partir de 18h30 a l'Ostau dau País Marselhés, al numèro 18 de la Carriera de l'Olivier, a Marselha 13005. www.ostau.net

 
 

---

Programa de la serada:
 
— 18h30: dubertura dei pòrtas
— 19h00: Restauracion sus plaça
— 20h00: Cants e còntes de Nadia Ammour
— 20h30: Projeccion dau filme