Pel primièr còp, la lenga occitana es al centre del debat dins lo Parlament Europèu. A la demanda de l’eurodeputada Catherine Grèze, elegida dins la circonscripcion del Sud-Oèst de França, l’intergrop sus las lengas minorizadas consagra la siá session d’uèi a la lenga d’òc. “Se França foguèsse pas dins l’UE i poiriá pas intrar perque acomplís pas los critèris de Copenaga per rapòrt a las minoritats”, çò declarèt l’eurodeputada a Ràdio Occitània (escotatz l’àudio çai-jonch).

L’intergrop sus las lengas minorizadas, format per d’eurodeputats de partits e de grops politics divèrses, s’amassa cada còp que i a session dins lo Parlament Europèu per tractar dels afars qu’afèctan las lengas e culturas minorizadas d’Euròpa. S’i tracta, normalament, lo cas concret d’una d’aquelas lengas e uèi es lo torn de l’occitan. Ça que la, serà pas lo primièr còp que se tractarà lo tèma per rapòrt a França, pr’amor que la politica francesa intransigenta amb las lengas mal nomenadas regionalas atrai de costuma l’atencion dels eurodeputats.
 
Segon Grèze, la tòca de la session es de “far avançar la causa occitana a Brussèlas” e apond que la lenga occitana es oficiala en Espanha, ont es parlada per qualques milièrs de personas, mas o es pas en França, ont i a l’immensa majoritat de la populacion occitana. Es per aquò que se demanda: “Quina sòrta d’egalitat i a entre los ciutadans europèus?”. Segon lo sieu vejaire, l’Union Europèa a l’obligacion d’intervenir pr’amor qu’ajudar pas una lenga implica de la daissar morir “a fuòc lent”. Grèze considèra, de mai, que la lenga occitana fa partida del patrimòni e de las raices de la cultura francesa, e doncas la siá proteccion equival a protegir lo patrimòni cultural francés. Per tot aquò, crei qu’es urgent que França signe la Carta Europèa de las Lengas Minoritàrias e Regionalas, qu’es, a prepaus, una promessa electorala de François Hollande.
 
L’eurodeputada Grèze a convidat, en aquela escasença, qualques especialistas a prene la paraula. Dins aquel sens, i son a participar Guilhèm Latrubesse, conselhièr regional de Miègjorn-Pirenèus e pòrtavotz del Partit Occitan (PÒC), Joan-Loís Blenet, president de la Confederacion de las Calandretas, e Felip Hammel, director del CIRDÒC. Al delà, un trentenat de militants de la federacion Euròpa-Ecologia e qualques occitanistas son anats tanben a Estrasborg per assistir a la session e vesitar lo Parlament Europèu.