Clémentine Autain a lançat un combat contra lo viòl dins l’Estat francés per mejan d’un tèxt que 313 femnas l’an signat. Es un “acte politic” per “liberar la paraula” de las victimas e interpelar l’opinion publica.

Lo jornal francés Le Nouvel Observateur ven de publicar un manifèst que 313 femnas l’an signat, entitolat “Declari èsser violada”. Aquel tèxt a per tòca de conscienciar la populacion de l’Estat francés, e sustot d’i traire lo tabó del viòl, que dins aquel territòri una femna es violada cada 8 minutas, çò es 75 000 viòls per an.
 
“Es ora de liberar la paraula, condicion sine qua non per n’acabar amb lo viòl. Volèm brisar lo silenci sus aqueles milions de femnas violadas. Declari que ne soi una. Declari èsser estada violada. O dire publicament, amassa, es un acte politic”, çò dison dins lo manifèst.
 
Segon Clémentine Autain, la primièra signatària del manifèst e militanta d’Osez le Féminisme, “lo silenci massís” qu’environa lo viòl dins l’Estat francés es “lo tabó que fa la lei del violaire”, e es aquela “vergonha que deu cambiar de camp”. Autain foguèt victima d’un viòl dins sos 22 ans.
 
An signat lo manifèst, a l’ora d’ara, 313 femnas de 18 a 87 ans de totas las categorias sòcioprofessionalas, que demest elas i a l’escrivana Frédérique Hébrard, la jogaira de tènis Isabelle Demongeot e Marie-Laure de Villepin, l’anciana esposa de l’èx-primièr ministre.
 
Contràriament a çò que se pensa, 80% dels viòls son estats comeses per un pròche de la victima. Es per aquò que demandan als poders publics d’acompanhar e formar los professionals de la justícia e de la polícia, e mai que i aja un grand movement d’educacion populara dins la societat per cambiar l’agach sul viòl.
 
Uèi 25 de novembre, es la Jornada Internacionala de Lucha Contra las Violéncias Fachas a las Femnas, una bona escasença de far una crida a la conscienciacion.