Lo Movement Nacional de Liberacion d’Azawad (MNLA) a desencadenat una ofensiva militara contra las milícias islamistas, que contraròtlan una partida del territòri, per fin de las fòrabandir. Al començament de 2012, l’MNLA proclamèt l’independéncia d’Azawad, que fins alavetz fasiá partida del nòrd de Mali, mas lo contraròtle efectiu del territòri es pas estat possible a causa de la preséncia de grops armats restacats a l’islamisme radical. Aqueles grops, que contraròtlan sustot qualques vilas grandas, coma Gao o Tomboctó, an comés d’atrocitats contra la populacion e, en nom de la lei islamica, an destruch qualques monuments amazighs considerats patrimòni de l’Umanitat.
 
La preséncia d’aqueles grops islamistas, coma Ansar Ad Din o Al Qaida del Magrèb Islamic (AQMI), met en perilh l’estabilitat e l’avenir d’Azawad coma país independent e a provocat de dobtes sus la capacitat de l’MNLA de contrarotlar efectivament lo país. Al delà, la comunautat internacionala fa de movements per menar a tèrme una intervencion militara qu’expulse las milícias islamistas e, previsiblament, torne lo contraròtle de la zòna al govèrn de Mali a travèrs d’una negociacion politica jol pairinatge de França.
 
Es per aquò que l’MNLA ensaja d’obténher lo contraròtle de tot lo territòri d’Azawad abans l’intervencion internacionala. L’operacion militara comencèt lo 13 de novembre passat en las basas que l’MNLA ten sus la zòna frontalièra amb Nigèr e, a l’ora d’ara, las tropas amazighs an capitat de manténer l’iniciativa militara contra çò que nomenan lo “terrorisme islamista”. Dins aquel sens, las fòrças amazighs avançarián cap a Gao.
 
En parallèl a l’ofensiva, qualques grops islamistas moderarián la lor politica. Es lo cas d’Ansar Ad Din, qu’auriá prepausat d’establir de contactes amb l’MNLA e qu’acceptariá de suspendre l’aplicacion unilaterala de la sharia. Aquela ofèrta de dialòg es estada planvenguda pel govèrn de Mali, amb sedença a Bamako, çò que poiriá implicar de negociacions multilateralas que metèsson en risc l’independéncia d’Azawad.