De desenats de milièrs de personas (60 000 segon la polícia, 600 000 segon los organizaires) manifestèron dimenge passat a Atenas contra l’acòrdi de Prespa, qu’establís que la republica de Macedònia se nomene desenant Macedònia del Nòrd. “Podèm pas acceptar que, amb aquel acòrdi, nos calga cedir nòstra Macedònia, nòstra istòria. Macedònia es grèga”, çò afortissiá una manifestanta als mèdias.
 
Los manifestants brandissián de drapèls grècs e de la Glèisa ortodòxa grèga del temps que cantavan l’imne nacional e de cançons patrioticas. Enfin, l’acamp s’acabèt amb d’afrontaments amb la polícia après qu’un grop de manifestants aguèt ensajat d’intrar dins lo Parlament. Aquí, a la fin de la setmana, se deurà ratificar l’acòrdi.
 
 
Un acòrdi istoric
 
Segon aquel acòrdi, lo remplaçament de Macedònia per Macedònia del Nòrd permetriá que Grècia renoncièsse a son vèto per que lo país intrèsse dins l’OTAN e dins l’Union Europèa. Pendent gaireben 30 ans, Grècia s’i es opausada per una question onomastica: la denominacion Macedònia, que definís tanben la region grèga que sa capitala n’es Tessalonica, podiá pas èsser lo nom d’un estat independent.
 
Justament, lo primièr ministre de Macedònia convenquèt son parlament de votar lo cambiament de nom per obténer l’acòrdi amb Grècia e poder far partida de l’OTAN e de l’UE. Lo cambiament de nom s’aprovèt per 81 vòtes en favor e 80 contra.
 
 
Una crisi de govèrn en Grècia
 
En Grècia, la drecha nacionalista e sobeiranista dels Grècs Independents a quitat l’acòrdi de govèrn amb Syriza, puèi qu’accèpta pas brica que lo tèrme de Macedònia faga partida d’aquel país.
 
Aquel pichon partit ten totun son grop parlamentari amb sos sièis deputats, çò que li ajudarà fàcia a las eleccions venentas. De son caire, Tsipras poirà governar car Syriza a pro de deputats, gràcias al sosten de deputats independents e de dos dissidents de son ancian aliat de drecha nacionalista. Per aquela rason, los mèdias grècs creson que i auriá un acòrdi prèvi entre las doas formacions politicas.
 

200.000+greeks protested today in Athens against Tsipras traitorous goverment & the Prespes Agreement for the Macedonian name.Police throw tear gases against small children,women & old men starting riots!#Greece#Macedonia#Συνταγμα#Συλλαλητηριο#Tsitsipas ΕΛΑΣ δημαρ #YellowVestpic.twitter.com/uWjkMdyCDS

— tzio-3- (@eastblock_3) 20 de gener de 2019

 

What I saw today:
1) Some 100k protestors against the Prespes deal for #Macedonia
2) The police threw the most tear gas I ve ever seen in a rally in #Athens in my 22 years as a journo.
Last time was in 1999 when US’s Clinton visited the GR capital.
There was no need for that. pic.twitter.com/96jKoiLVqk

— Liana Spyropoulou (@LSpyropoulou) 20 de gener de 2019

 

Demonstration in #Athens against the agreement on #Macedoniapic.twitter.com/ErGjzcotwP

— nonouzi (@Gerrrty) 20 de gener de 2019

 

Day of protest in the streets in #Athens. Peaceful until this point. pic.twitter.com/4m4FkIWXp2

— vivian (@vivkassa) 20 de gener de 2019

 
Macedònia: quicòm mai qu’un nom
 
Mas la disputa per l’usatge del nom Macedònia va delà lo toponim. En realitat, amaga lo conflicte territorial de l’identitat macedoniana.
 
D’un caire, Macedònia es un territòri istoric e geografic que sas frontièras an cambiat long de l’istòria. A l’ora d’ara, compren los estats de Grècia, Macedònia del Nòrd, Bulgaria, Albania, Serbia e una pichona partida de Kosova. Se tracta d’un airal de 67 000 km² e d’una populacion de 4,76 milions d’abitants.
 
Per Grècia, Macedònia es una partida del país ellèn –amb una granda importància istorica restacada al reialme d’Alexandre lo Grand– que sa capitala istorica es Salonica. A l’ora d’ara, es devesida en tres administracions regionalas, que comprenon lo nom de Macedònia, çò qu’es a l’origina de la crisi. Mas en realitat, la disputa grèga cèrca d’amagar la minoritat nacionala eslava de lenga macedoniana que Grècia reconeis pas. E tanben escond las ambicions d’una part del nacionalisme grèc sus Albania, Macedònia, Bulgaria e Turquia.
 
La dominacion otomana e las guèrras successivas an provocat long de l’istòria mai d’un cambiament uman dins la region, e dins la Macedònia de l’estat grèc lo mescladís de las populacions turcas, grègas e eslavas èra fòrça intens a l’epòca otomana. Après la guèrra grècoturca, lo cambiament de populacions foguèt fòrça crusèl. Dins la Macedònia grèga s’installèron fòrça grècs expulsats d’Anatolia del temps que fòrça familhas turcas èran fòrabandidas de Grècia. L’acòrdi de Neuilly-sur-Seine de 1919 tanben provoquèt lo desplaçament per fòrça de maites macedonians en Bulgaria.


Revendicacion bulgara
 
D’autre caire, qualques sectors del nacionalisme bulgar revendican Macedònia tota. Non solament per la revendicacion de la Granda Bulgaria mas tanben per la lenga. Lo macedonian eslau es fòrça pròche del bulgar e segon qualques unes son la meteissa lenga.
 
 
Las minoritats de Grècia
 
Oficialament, Grècia reconeis l’existéncia de minoritats "musumanas" sus son territòri, mas rebuta categoricament l’existéncia d’una minoritat eslava macedoniana.
 
Totun, las organizacions de dreches umans considèran qu’en Grècia i a entre dètz mil e trenta mila eslaus macedonians que se pòdon distinguir sustot perque parlan macedonian, una lenga que los bulgars considèran coma un dialècte bulgar. D’autre caire, i tanben dos milions de grècs de lenga grèga que se considèran macedonians.
 
 
La lenga macedoniana
 
Lo bulgar es estandaritzat segon los parlars del centre e de l’èst del país, mentre que lo parlar de l’oèst —comprés lo de la capitala Sòfia—, sonat shop o “parlar de païsan”, es gaireben identic al macedonian oficial. Per contra, lo macedonian oficial es estandardizat dins una grafia que sembla subsidiària de la sèrba.
 
Per tant, quinas que ne sián las rasons, tant Grècia coma Bulgaria rebutan l’existéncia de la lenga macedoniana coma diferenta del bulgar.