Lo president regional de Normandia, lo centrista Hervé Morin, anoncièt dissabte passat la mesa en plaça d’un “plan regional” pel parlar normand. L’anóncia la faguèt dins l’encastre d’un collòqui sul normand a Caen (Normandia), amb l’idèa d’”èsser fièrs de çò que [son], de la region, de [lor] identitat, de  [ lor] cultura, de [ lor] eiretatge”.
 
Segon lo plan anonciat per Morin, se reïntroduirà lo normand dins las escòlas primàrias del temps que los collègis e los licèus prepausaràn una opcion de normand, se farà una enquèsta sociolingüistica, se crearà un atlàs lingüistic sonòr, se finançarà un programa de recèrca e se crearà una acadèmia de la lenga normanda. En mai d’aquò se metràn a bon tèrme d’autras accions amb los collectius especializats en matèria de patrimòni cultural.
 
 
Bastir l’identitat normanda
 
Lo president normand precisèt tanben que, per tal de “bastir l’identitat normanda” l’administracion de la region voliá comunicar al grand public per que “cadun se tornèsse apropriar aquela lenga”. Dins aquel sens, prepausa de cafès normands e de tempses d’escambis sus la lenga normanda.
 
 
La senhaletica
 
Una autra de las mesuras que las prepausèt lo president Morin es d’installar de panèls senhaletics en normand a l’intrada e a la sortida de las comunas.
 
 
Oposicion
 
L’oposicion socialista al conselh regional a manifestat son desacòrdi. “Quand de normands dormisson a la carrièra, utilizar l’argent public per far de panèls senhaletics en normand deuriá èsser pas la prioritat de la region”, çò diguèt Nicolas Mayer-Rossignol dins un comunicat.
 
L’elegit ditz que parteja l’interès de preservar e valorizar lo patrimòni regional, mas planh que s’i emplegue d’argent public en precisant que “la collectivitat regionala se deuriá puslèu focalizar sul poder de crompa de [lors] conciutadans”.
 
 
Un dialècte d’oïl non reconegut
 
Lo normand es un dialècte de la lenga d’oïl non reconegut dins l’estat francés. Es solament lenga oficiala a Jersey, dins las Illas Normandas, amb l’anglés e lo francés, e i es reconegut coma lenga de cultura. Ça que la, la lenga anglesa conten fòrça normandismes que foguèron incorporats tre l’invasion normanda d’Anglatèrra en 1066. Lo fenomèn de l’emigracion explica que lo normand aja fòrça influenciat lo francés parlat en Quebèc.

 
 
 

 

La @RegionNormandie organisait ce matin les Premières rencontres régionales de la langue normande. Son Président @Herve_Morin en a profité pour annoncer devant 200 passionnés un grand plan de sauvegarde et de développement de ce formidable patrimoine. #attractivitépic.twitter.com/0oeZLbD7CO

— Rudy Niewiadomski (@RudyNiewia) 19 de gener de 2019