L’Associacion carcinòla Aquí l’Òc contunha son prètzfach de desvolopament de la lenga e la cultura occitanas dins lo nòrd de Carcin, mai que mai dins los cantons de Sant Seren, Cèra e del Segalar Carcinòl, e prepara son activitat per 2019 amb mai de vam que jamai. Atal se faguèt public dins l’amassada generala que se tenguèt lo 19 de genièr passat. “L’estrambòrd de cadun serà una fòrça per far viure plenament nòstra bèla lenga occitana”, çò diguèt lo president Estève Clerc als sòcis presents a l’amassada.
 
La còla d’Aquí l’Òc alestís sas activitats per 2019 gràcias als benevòls. De soslinhar las presentacions e lecturas del libre Solidaritat de Pèire Derreste, reeditat per la quita associacion, l’organizacion d’una quina en occitan e sustot lo festenal Escambis, qu’ongan se debanarà del 17 al 19 de mai a Sant Joan de la Ginèsta, Banas e Sent Miquel lo Veson.
 
Aquela activitat la menon a bon tèrme amb lo sosten financièr de la region qu’a pres lo nom d’Occitània, l’Ofici Public de la Lenga Occitana, la Comunautat de comunas Cauvaldor e lo departament via l’IEO d’Òlt.
 
Aquí l’Òc es una associacion que son sèti es a Sant Seren (Limarga) e que sa tòca es de promòure e desvolopar la lenga e la cultura occitanas dins lo nòrd de Carcin. Tanben sosten l’escòla Calandreta l’Esquiròl. Vila de l’escrivan Pèire Brayac, Sant Seren sèrva de nombroses locutors d’occitan qu’an popat la lenga al brèç, e mai aculhís de corses d’occitan per adultes en mai de las classas d’occitan dins doas escòlas publicas, un collègi e un licèu.
 
Podètz vesitar lo sit Internet d’Aquí l’Òc e tanben lo grop de Facebook fòrça actiu.