Despuish lo prumèr de genèr passat, la lei francesa dita Lei Labbé que defen la venta de glifosat aus particulars. D’ací a tres ans, que pertocarà tanben los professionaus. Ua nautat qui fòrça los utilizaires (bèths còps completament gahats) a virà’s cap a produits alternatius.
 
 
La potinga de mairbona?
 
E se la solucion e’s trobè (un còp mei?) en lo saberhar païsan? Qu’ei en tot cas çò que sembla díser l’estrambòrd creishent per la marca Oeliatec.
 
Qu’ei lo breton  Jean-Pierre Barre, ancian venedor de produits fitosanitaris (!) , qui prumèr e sentí lo vent a virar peus pesticidis, au començar deus ans 2000. De cap tà las prumèras restriccions, que’s brembà alavetz deus ajòus qui s’i hasèn dab l’aiga deu cosèr de las patatas entà’s virar de la porguèra.
 
Ua potinga de mairbona, qui poderé benlèu partvirar l’economia deu deserbatge! Totun, lo metòde qu’a drin cambiat en rapòrt a çò qui’s hasè un còp èra:  que parlam aquiu de maquinas modèrnas, reservadas peu moment aus professionaus, qui vaporizan a baisha pression gotetas d’aiga a 120 grads, shens nada quimia…e que marcha! Dab tres passatges annaus, b’ei cueita la porguèra!
 
Si s’ac vira plan uei lo dia, Jean-Pierre Barre qu’a totun devut combatejar hèra entà convéncer lo monde, mei que mei las bancas, de la viabilitat deu son projècte. Mes a l’òra quan lo glifosat ei au punt de vàder interdit per de bon en frança, l’idea ne sembla pas mei tant hòla.  Que’n ven ua cada dia, pertot en Euròpa, e que s’espandeish de contunh despuish 2007, data de la prumèra venta. Uei lo dia, l’enterpresa Olieatec qu’emplega 30 personas (ua mei cada mes!) per ua chifra d’ahar de 4 milions d’èuros; qu’ei lo davantalèr deu son sector d’activitat, davant lo famós Kärcher.
 
Alavetz, la transicion ecologica que poderé donc vàder ua oportunitat economica seriosa, fin finau.
 
 
 
 
Ràdio País 
 
 

---

Aqueste article es possible gràcias a un acòrdi de cooperacion entre Jornalet e Ràdio País.