Los nòu presonièrs politics catalans son ara a Madrid. La gàrdia civila menèt ièr divendres de matin los sèt òmes a las presons de Soto del Real, e a la d’Alcalá Meco las doas femnas. Los Mòssis d’Esquadra los avián menats de las divèrsas presons al centre penitenciari de Brians IId, ont la gàrdia civila los emportèt devèrs Madrid. A Brians II i aviá lo president de le Generalitat en foncions, Quim Torra, qu’anèt prene comjat d’eles. Una molonada manifestava son sosten als presonièrs. Lo jutjament començarà lo 12 de febrièr. O anoncièt ièr la Cort Suprèma espanhòla, lo meteis jorn que los menavan a Madrid.
 
 
Un jutjament rapid
 
Totes los acusats son enseguits per aver organizat o permés lo referendum d’independéncia de Catalonha e Aran lo 1r d’octòbre de 2017.
 
Lo jutjament lo vòlon far rapid per qu’interferisca pas dins las eleccions municipalas e europèas del 26 de mai. Aquel jorn se tendràn tanben las eleccions al Conselh General d’Aran e dins divèrses govèrns regionals espanhòls. Amb aquel calendièr es previst que las senténcias sián publicadas en junh o julhet.
 
Las sesilhas se tendràn los dimars, dimècres e dijòus, de 10h a 18h, amb una pausa de 1h30 per dinnar. Los presonièrs seràn menats cada jorn de la preson al tribunal e del tribunal a la preson. Poiràn declarar sens las manetas mesas durant lors sesilhas.
 
Lo tribunal que los jutja es compausat de sèt jutges. Cinc d’eles foguèron recusats per los avocats per manca d’imparcialitat, mas aquelas recusacions son estadas refusadas.
 
Las sesilhas seràn retransmesas per television.
 
 
Refusats los observaires internacionals
 
Lo tribunal a rebutat la demanda dels avocats e de mai d’una organizacion internacionala coma Amnestia Internacionala e Trial Watch d’aver dins la sala d’observaires internacionals. La cort a escotat lo ministèri public qu’afirma que lo jutjament serà retransmés per la television e que, per tant, los observaires internacionals an pas besonh d’èsser presents.
 
 
Las penas encorregudas
 
Lo ministèri public demanda que sián acusats de rebellion, malversacion de fonzes e sedicion. Per Oriol Junqueras, desira 25 ans de preson e d’inelegibilitat; per Carme Forcadell, Jordi Cuixart e Jordi Sànchez, 17 ans de preson e d’inelegibilitat, e per Rull, Turull, Romeva, Forn e Bassa, 16 ans de preson e d’inelegibilitat. Al costat del ministèri public, lo partit ultradrechista Vox es partida civila.
 
 
Los autres enseguits
 
Mentretant, s’alestís a Barcelona lo procès contra los autres membres del govèrn de Puigdemont, contra lo burèu del Parlament de Catalonha e contra la deputada occitana Mireia Boya. Pels èx-ministres de la Generalitat Carles Mundó, Santi Vila e Meritxell Borràs, que son en libertat condicionala, se sollicita 7 ans de preson per malversacion e desobesissença. Dins lo cas dels membres del burèu del parlament e l’èx-deputada occitana de la CUP, Mireia Boya, lo ministèri public sollicita una multa de 30 000 èuros per desobesissença.
 
 
Los testimoniatges
 
La Cort Suprèma espanhòla citarà a declarar l’èx-president del govèrn espanhòl Mariano Rajoy, sa vicepresidenta Soraya Sáez de Santamaría e l’èx-ministre de las finanças Cristóbal Montoro. Tanben seràn cridats a testimoniar un fum de politicians espanhòls, bascos e catalans e l'occitana Mireia Boya. Tanben cridaràn qualques ciutadans e d’agents de la polícia espanhòla. Pasmens, lo tribunal a refusat que la defensa cride a declarar lo president de la Generalitat en exili, Carles Puigdemont e lo rei d’Espanha, Felip VI entre d’autres. De soslinhar lo refús de las compareissenças dels especialistas en dreches umans Noam Chomsky e Paul Preston, e mai dels raportaires de l’ÒNU David Kaye e Alfred Maurice de Zayas.
 
 
Mobilizacions
 
En Catalonha son anonciadas de mobilizacions durant tot lo procès del jutjament dont una cauma generala lo 7 de febrièr. Las principalas associacions independentistas an cridat a manifestar quitament a Madrid e dins divèrsas vilas europèas, dont Tolosa.
 
 
Sosten del govèrn de la Generalitat als presonièrs
 
Après prene comjat dels presonièrs, lo president de la Generalitat en foncions, Quim Torra, diguèt que lo govèrn espanhòl mancava “de coratge e de volontat” per far los cambiaments necessaris a una democracia plena.
 
Torra prononcièt son discors en catalan e en anglés, e faguèt una crida a la comunautat internacionala e a las organizacions pels dreches umans de tot lo Mond. Segon Torra, dempuèi octòbre de 2017 los dreches fondamentals en Catalonha “son violats d’un biais vergonhós”.
 

▶ Declaració institucional del #Govern pel trasllat dels presos polítics a Madrid. pic.twitter.com/RfLbShstbr

— Govern. Generalitat (@govern) 1 de febrer de 2019

 
 
Sosten de José Bové
 
L’eurodeputat occitan José Bové es un dels politicians internacionals engatjats amb los presonièrs politics catalans. Dins son sit web, Bové remembra çò qu’el diguèt al president espanhòl: “Cossí considerar que d’elegits al nivèl europèu, puèi al nivèl catalan, sián encarcerats per lors idèas politicas? I a pas de dialòg possible, amb de deputats, de membres del govèrn regional e dels representants associatius en preson”, çò ditz.
 

 
 

---

Lo passatge del cortègi que menava lo presonièrs politics a Madrid èra seguit per de mond que lor donavan de sosten.
 

Pell de gallina. #FreeTothompic.twitter.com/nOKq6LyykH

— Jaume Clotet (@jaumeclotet) 1 de febrer de 2019

Reaccion de Taula per Aran