Jèsus nasquèt a Betelèm, se’n sap lo moment exacte, e la virginitat de Maria “es pas un mite, mas una vertat”, çò conclutz, entre d’autras afirmacions, lo darrièr libre del papa Beneset XVI, L’Enfança de Jèsus.

Lo pontife assegura “sens cap de resèrva” que Jèsus foguèt concebut per òbra e gràcia del Sant Esperit e nasquèt de la Verge Maria. A partir del dialòg entre Maria e l’àngel Gabrièl, se pòt veire que Dieu, a travèrs d’una femna, cèrca una “nòva intrada dins lo Mond”, çò ditz Ratzinger.
 
Dins lo tresen libre de la trilogia del papa sus Jèsus de Nazaret, de 176 paginas e que s’es tradusit en nòu lengas, Beneset XVI afirma que sap fòrça ben qual es Jèsus, d’ont ven; e assegura qu’aperten a una epòca “perfièchament databla e a un encastre geografic perfièchament indicat”: a Betelèm, l’an 15 de l’empèri jos Tibèri Cesar, en acòrd amb l’Evangèli segon Luc.
 
Al delà de tot aquò, lo papa Ratzinger assegura que l’Evangèli ditz pas que i aguèsse un buòu e un ase dins lo presep: “se parla pas d’animals” al luòc ont nasquèt Jèsus, mas o justifica en disent que, pr’amor que s’agís d’una grépia, ont manjan los animals, “l’iconografia crestiana captèt fòrça lèu aquel motiu” e l’incorporèt. Es ben per aquò qu’a l’ora d’ara incorporam totjorn un buòu e un ase dins los betlèms.
 
Lo cap de la glèisa catolica explica atanben que Dieu interven dirèctament sul Mond material sonque en dos moments de l’istòria de Jèsus: la Concepcion de la Verge e la Resurreccion. Ça que la, Beneset XVI nos remembra que Dieu sonque se permet d’agir dins l’encastre esperital, pas jamai dins lo material.
 
Lo pontife gausa afirmar quitament que l’adoracion dels Reis Mages d’Orient es un fach istoric. Pasmens, s’aquò foguèsse pas vertat, afectariá pas cap d’aspècte essencial de la fe.