A l’ocasion del jutjament imminent dels presonièrs politic catalans, un vintenat de personas s’acampèron diluns passat a Niça per reclamar la liberacion dels presonièrs politics. L’acamp seguís las activitats del Collectiu dels Alps Maritims de Solidaritat amb lo Pòble Catalan qu’amassa d’organizacions occitanistas, pròdreches umans e de migrants catalans. Denóncia la repression que la patís Catalonha après lo referendum del 1r d’octòbre de 2017 e ne revendica una solucion politica.
 
“Eravam gaire: pas mai d’un desenau, mas de gents motivadi”, çò a explicat Ciril Joanin, de l’Assemblada Occitana, a la redaccion de Jornalet. “Si siam recampats au 4 Baloard Joan Jaurés perque es a aquesta adreiça que si tròba lo vicecònsol d’Espanha. Siam montats lo veire mas èra absent”, çò precisa.
 
Lo collectiu fa una crida als individús e a las organizacions engatjadas pels dreches umans sus aquel afar, del temps que denóncia la volontat dels “jutges espanhòus de la Cort Suprèma e de l’Audiéncia Espanhòla, jurisdiccion eiretada de la dictatura de Franco, de menar a tèrme un jutjament politic” contra de personalitats catalanas qu’exerciguèron pas cap de violéncia e respectèron solament lor mandat politic o associatiu. E mai, soslinha que nòu personas pacificas son estadas encarceradas pendent mai d’un an e que las acusacions contra eles son totalament desproporcionadas.