Lo govèrn de la Generalitat de Catalonha a aprovat de commemorar lo desen anniversari de la mòrt de Robèrt Lafont. Dins aquel sens, a previst de programar d’activitats culturalas, academicas e de divulgacion de la vida e de l’òbra de Lafont. Per o far, se va constituir un comitat organizaire compausat d’associacions e de personas de tot lo domeni occitan coneisseiras de la figura e l’òbra de l’escrivan, lingüista e politician occitan.
 
Aquela celebracion, que l’anoncièt en octòbre passat la ministra de la cultura de Catalonha, Laura Borràs, dins l’encastre de la remesa del prèmi Robèrt Lafont, ven ara de se concretizar. A aquel moment, Borràs qualifiquèt Lafont coma “er activista qu’avie clar que lengua e construccion sociala e politica e democratica anàven dera man”.
 
Robèrt Lafont foguèt laureat de la Crotz de Sant Jòrdi pel Govèrn de la Generalitat de Catalonha en 1987. Puèi, en 2010, lo govèrn catalan instituiguèt lo prèmi Robèrt Lafont amb la tòca de reconéisser de personas o d’entitats que se sián distinguidas per la defensa, la projeccion e la promocion de la lenga occitana. Dins la darrièra edicion lo guierdon anèt al lingüista alemand, Georg Kremnitz. Los laureats de las autras annadas son estats Pèire Bèc, Felip Gardy, Jacme Taupiac e la Fondacion Musèu Etnologic de la Val d’Aran.
 
Robèrt Lafont es considerat coma una de las pus grandas figuras istoricas de l’occitanisme.  Foguèt un intellectual occitan e pus particularament un lingüista, un escrivan, un istorian, un especialista de la literatura e un teorician politic.
 
Èra maridat amb l’escrivana, traductritz e ensenhaira italiana Fausta Garavini.
 
 

Commemoram eth 10au aniversari dera mòrt deth lingüista Robèrt Lafont, gran impulsor e defensor dera lengua occitana, ua des lengües oficiaus de Catalonha. Gràcies deputada @geli_anna e conselhèra @LauraBorras! https://t.co/FjuH6MhQ6Epic.twitter.com/qAWvjDDZB2

— Quim Torra i Pla (@QuimTorraiPla) 7 de febrer de 2019

 

---

Per ne saber mai recomandam de legir:
 
— Lenga e nacion: la pensada dinamica de Robèrt Lafont (I) e (II) de Domergue Sumien
 
— “Non coneissi degun qu’aja pres la relèva de Robèrt”, entrevista de Fausta Garavini facha per Marçal Girbau.