Bordèu aurà pas una carrièra de Frantz Fanon: lo cònsol màger, Alain Juppé, a rebutat la proposicion d'apelar una carriereta d’un nòu quartièr de la vila amb lo nom de la granda figura anticolonialista. “Uei, la causida deu nom de Frantz Fanon suscita d’incomprenesons, de polemicas, d’oposicions que jo pòdi compréner. Dens un chepic d’apatzament, qu’èi doncas decidit de diferir aquera proposicion”, çò a dich.
 
La comission municipala de denominacion de las carrièras aviá decidit de nomenar Frantz Fanon una carrièra del quartièr de Ginko, dins lo nòrd de Bordèu, una causida que la validèt en decembre passat lo conselh municipal. Mas Juppé es tombat dins las exigéncias de l’oposicion municipala d’extrèma drecha, lo Recampament Nacional, que refusa energicament que s’atribuisca una carrièra a l’umanista martiniqués, grand teorician dels procèsses de descolonizacion, car èra pròche del Front de Liberacion Nacionala (FLN) d’Argeria durant la guèrra d’independéncia.
 
La decision municipala l’an denonciada qualques collectius bordaleses, dont Memòrias & Partatges, que recòrda qu’almens una vintena de carrièras de la capitala girondina pòrtan de noms d’esclavatgistas.
 
Frantz Fanon foguèt un psiquiatre nascut en Martinica en1925, que consagrèt sa vida a la descolonizacion e a la psicopatologia de la colonizacion. Sas òbras, especialament Les damnés de la Terre (Los damnats de la Tèrra), an inspirat de movements de liberacion anticolonialistas long del sègle XX. Sa pensada es ara difusada per la Fondacion Frantz Fanon, que sa filha Mireille n’es la presidenta. (Ne podètz trobar una bèla entrevista en catalan sus El Nacional).