Jos lo lèma “Pas d’Occitània sens occitan”, los occitans de tot lo país son cridats dimenge 17 de febrièr a manifestar a Tolosa contra la supression de nòstra lenga de l’educacion publica francesa. La manifestacion l’organizan amb lo supòrt de la Federacion de las Calandretas e de la Federacion dels Ensenhaires de Lenga e Cultura d’Òc (FÈLCO).
 
Segon nòstras informacions, sostenon la manifestacion e cridan a manifestar las organizacions seguentas: CRÈO Tolosa, FÈLCO, IEO, ÒcBi, Felibritge Mantenéncia Lengadòc, Calandretas,  Assemblada Occitana, Convergéncia Occitana, Ostau Biarnés, Ostau Comengés, Carnaval Gascon, Escota e Minja, Païs de Catinou, Lo Congrès, CCOR, Cap a l’òc, ADÒC, CAÒC, Jornalet, Òc Malhòrca, Aquí l’òc, Felibritge mantenéncia Gasconha Naut Lengadòc, CELO, Institut d'Estudis Aranesi-Acadèmia Aranesa dera lengua occitana, Generalitat de Catalonha - Direccion Generala de la Politica Lingüistica.

 
Lo CRÈO Tolosa a tanben recebut fòrça letras de sosten de plusors senators, deputats e cònsols màgers, e mai que mai de parents d’escolans e d’ancians escolans.
 
 
Finançament participatiu
 
Per finançar l’organizacion de la manifestacion, e las divèrsas accions que mena a bon tèrme lo CRÈO Tolosa per reconquerir los mejans especifics per l’ensenhament de l’occitan, s’es aviat un finançament participatiu. Trantalhetz pas per far vòstre don sul sit OkPal.
 
Sus plaça i aurà de pegasolets a 1 èuro l’unitat per sosténer la manifestacion.
 
 
D’autobuses per i anar
 
Lo CRÈO Tolosa organiza d’autobuses per se gandir a la manifestacion dels uèch departaments que cabon dins l’acadèmia de Tolosa.
 
Se prepausa los autobuses seguents. Lo prètz del viatge serà liure e se pagarà çò que se considerarà just.
   
 Lo principi es la liura participacion dels viatjaires, lo CRÈO Tolosa farà lo complement. Cal totun reservar.
 
Lo pargatge dels buses a Tolosa es al monument als morts, alèas F.Verdièr.
 
En Catalonha se son organizats de coveituratges.

 
Los detalhs del cortègi
 
Lo cortègi partirà a 14h de la plaça del Capitòli e passarà per la Carrièra de la Poma, la Plaça de Sant Jòrdi, la Carrièra Bolbona e la Plaça de Sant Estève. Aquí se depausarà una crida a la prefectura. Puèi contunharà per la carrièra de Mètz, la Carrièra d’Alsàcia-Lorena, la Carrièra Lafaieta e finirà tornarmai al Capitòli.
 
 
L’ora es gravissima
 
“L’ora es gravissima”, çò explicava Jornalet lo president del CRÈO Tolosa, Nicolau Rei-Bèthvéder. “Pels provisors de licèu e principals dels collègis nos arriban los messatges del rectorat e del ministèri. Son clars: vòlon chaplar l’occitan en licèu e collègi dins los uèit departaments de l’acadèmia de Tolosa”, una de las onze subdivisions escolaras que cabon en Occitània dins l’estat francés.
 
L’acadèmia de Tolosa a mes fin a la dotacion especifica que finança l’occitan dins los collègis e licèus e daissa sens occitan gaireben 15 000 escolans. Tanben son pertocats una cinquantena d’ensenhaires d’occitan dins l’acadèmia mondina.
 
Dins la rèsta d’Occitània administrada per França, la situacion es pas melhora. Dins las acadèmias de Lemòtges, Clarmont e Grenòble, l’occitan dins los licèus e collègis es anecdotic. A Montpelhièr e Ais, l’occitan a fòrça reculat davant las atacas dels diferents rectors. D’anóncias de barraduras son estadas fachas en Provença ont lo rector se trufa “d’una lenga que se parla pas”. L’explicacion de la fin de l’occitan es lo pretèxt de la reforma Blanquer dels licèus. Lo 60% dels escolans del segondari es dins l’acadèmia de Tolosa.
 
L’occitan es tanben fòrt a Niça, mas patís fòrça la reforma mortifèra dels licèus. Lo quite cònsol màger, Christian Estrosi, a sasit lo ministre de l’educacion francés Jean-Michel Blanquer.
 
La vertat es que i a al Ministèri de l’Educacion de París una volontat evidenta de metre fin a l’ensenhament de la lenga nòstra.
 
 
 
 
 

---

Manifestacion contra la supression de l'ensenhament de l'occitan
Dimenge 17 de febrièr 2019 a 14h00 sus la plaça del Capitòli de Tolosa