Lo cadavre de l’istoric dirigent palestinian Yasir Arafat serà exumat deman dimars per una còla d’expèrts franceses e soïsses, jos la supervision d’una delegacion russa, per obténer de pròvas qu’ajuden a esclarzir las rasons de sa mòrt.

“Lo 27 se dobrirà lo tombèl sens cap de preséncia dels mèdias”, çò diguèt dissabte passat, en conferéncia de premsa, Tawfiq Tirawi, president de la comission creada per l’Autoritat Nacionala Palestiniana (ANP) per esclarzir las rasons de la mòrt del dirigent palestinian en 2004.
 
Tirawi expliquèt los procediments per l’exumacion del cadavre e las recèrcas sus plaça. E afirmèt que tot se fariá en acòrdi amb la “sobeiranetat palestiniana”.
 
Al delà, expliquèt que la còla judiciala francesa qu’es en carga del cas s’ocupariá de la recèrca sus plaça, mas “solament lo parquet palestinian prendr[iá] testimoniatge a las gents” qu’environèron Arafat pendent sos darrièrs jorns a Ramallah.
 
La veusa d’Arafat, Suha, ne denoncièt la mòrt l’estiu passat a un tribunal francés, après qu’amb l’ajuda d’Al Jazira, un institut scientific soís descobriguèt de rèstas de polòni dins un de sos vestits e dins sas apertenéncias.
 
Segon Tirawi, doas còlas scientificas participaràn a l’analisi d’extraches biologics del cadavre, una francesa e una soïssa, e “los resultats ne seràn liurats immediatament als palestinians”. “Al començament, los franceses refusèron d’o far, mas l’acòrdi final o exigís aital”, çò apondèt.
 
La delegacion russa tendrà lo ròtle d’observador de tot lo procès, a la demanda exprèssa del president de l’Autoritat Nacionala Palestiniana (ANP), Mahmud Abbas.
 
Arafat moriguèt dins un espital militar près de París, l’11 de novembre de 2004, après qualques setmanas d’agònia a Ramallah, ont fasiá tres ans qu’èra resclaus per Israèl.
 
La rapida deterioracion de sa santat encoratgèt de suposicions de totas menas sus un possible empoisonament, e la descobèrta del polòni refortiguèt aquela teoria.