Lo temps de las Febrejadas
 
Las Febrejadas se dobrisson aqueste divendres 22 de febrièr, a Carcassona, amb una conferéncia d’Alan Roch sul caçolet a l’Ostal de Quartièr de la Barbacana (18h). Lo temps de paraula serà seguit d’un sopar-caçolet.
 
Tres rendètz-vos se debanaràn, dins lo barri vesin, a l’Ostal Sirventés (79, la Trivala):
   
 
Catars, un patrimòni escrit
 
La mòstra "Catars, un patrimòni escrit" (que se ne parlèt ja dins aquestas paginas) se perseguís al castèl comtal de la Ciutat de Carcassona fins al 10 de març. L’escasença per las Febrejadas de prepausar una novèla vesita comentada pel Joan-Loís Gasc (guida-conferencièr, conceptor de la mòstra amb Anna Brenon). La vesita se debanarà lo divendres 1r de març, a 2 oras del vèspre (10 èuros; inscripcion necessària: ieo11@ieo-oc...)
 
 
EBTè en Corbièras
 
Joan-Francès Tisnèr e sos musicaires prendràn lo camin de Barcelona pel festenal Tradicionàrius. En camin, s’arrestaràn lo divendres 8 de març en Corbièras, a Montlaur (21 h, al Fogal) per interpretar lor concèrt-bal EBTè-trad, un balèti electroacostic amb un vam federator de la musica tradicionala e de las possibilitats de las tecnicas modèrnas.
 
 
Cultura Viva
 
A l’Ostal de las Memòrias de Carcassona serà presentada, a l’iniciativa del GARAE, una mòstra del CIRDÒC sul Patrimòni Cultural Immaterial: "Cultura Viva", amb d’ajusts sul territòri audenc (torn de l’ase; caçolet; rugbis; l’accent; la revista Folklore e lo GARAE). L’IEO Aude es associat al debanament de la manifestacion.
 
L’estrena se farà lo divendres 8 de març. Se reçauprà Micheu Chapduelh per parlar de l’imaginari del quotidian (21 de març, a Argon) e veire lo film sus el (divendres 22 de març, a l’Ostal de las Memòrias) en companhiá del realizaire Patric Lavaud. Joan-Francés Saisset parlarà rugbis, lo dijòus 11 d’abril. Lo final, la darrièra dimenjada d’abril, desira mostrar las riquesas musicalas divèrsas del territòri: bodega, Carnaval, corala, musica gitana, las campanas, las orguenas de la catedrala, e benlèu… la musica militara…
 
 
Fasètz la Lenga en Cabardés
 
Dempuèi mai de 5 ans, la debuta de març se marca en Cabardés per la tenguda de la quinzenada d’animacions Fasètz la Lenga en Cabardés, portada per l’associacion del meteis nom.
 
Pertocada per l’aigat d’octobre, la comuna de Vilagalhenc es pas en mesura de reçaupre d’animacions per la quinzenada, mas serà l’encastre de jornadas de rescontre amb un grop vocal de las Balearas per Total Festum a la fin del mes de junh.
 
La quinzenada se dobrirà dimarç 12 de març a Argon amb los cantaires de l’associacion Cossí que Siague (18h) e Brassens en occitan per Felip Carcassés (20h45). Lo dijòus 14, al teatre Na Loba de Puègnautièr, se jogarà la pèça inspirada dels escrits d’Alèm Surre-Garcia Man trobat (20h45). Lo dissabte 16 de març, Lo Barrut farà restontir sos cants polifonics a Mossolens. Lo dimenge 17 serà consacrat a un obrador-cosina de matin e una passejada lo vèspre del costat de Ventenac de Cabardés. Lo dimars 19, lo grop Tarabastar animarà la taulejada (19h) a Puègnautièr. Avèm ja parlat de la conferéncia de Micheu Chapduelh (dijòus 21, 20h45, a Argon). Moussu T clavarà aquesta programacion de tria (dissabte 23, 20h45, a Ventenac de Cabardés).
 
 
Manu Théron en país audenc
 
Se poirà profeitar d’una serada sens programacion Fasètz la Lenga, lo divendres 15 de març, per anar escotar l’espectacle Madalena, que recampa de grops femenins occitans, dirigits pel Manu Théron a l’Airòl cultural de Corbièras a Ferrals.
 
Se tornarà trapar lo cantador provençal a la debuta d’abril (dissabte 6) a Concas d’Orbièl per clavar la setmana Concas en Òc que vos presentarem mai en detalh un autre còp.
 
 
 
 
Mirèlha Braç