Actualitats
Torneg de Sièis Nacions de 2019 de rugbi de XV: primièra pauseta entre doas jornadas
Lo Torneg de las 6 Nacions torna dins l'actualitat d'Occitània. Per aquela rason, mentre que se tendrà aquela competicion, Jornalet publicarà cada dimars la cronica de Gèli Grande qu’auretz pogut escotar cada diluns sus Ràdio Lenga d’Òc.
Aquesta fin de setmana dels 16 e 17 de febrièr, del temps que l’occitanisme cultural e politic manifestava per las carrièras de Tolosa contra lo poder politic francés que compta d’escanar encara mai nòstra lenga occitana, lo Torneg de las Sièis Nacions fasiá una pauseta.
Per tot çò que tòca Occitània es pas sonque la lenga qu’es atacada. Cal espepissar tanben cossí es contada l’istòria oficiala de França per la meteissa escòla e analisar las consequéncias en çò dels jogaires e dels suportaires de quin espòrt que sia.
Quand comença lo Torneg de las Sièis Nacions, pels franchouillards lambda que malastrosament per una bona part son d’occitans, solide cal acarar Escòcia, Galas, Irlanda e Itàlia mas lo sol rescontre que compta es lo contra los angleses.
“Los nòstres enemics ereditaris!”
Cada an tanben lo quotidian esportiu L’Équipe, grand destillador d’ultranacionalisme francés, publica un especial Torneg de las Sièis Nacions.
Ongan es consagrat als Crunchs, escaisnom dels rescontres annals entre Anglatèrra e los occitans de França.
Doas paginas son consagradas a çò que los jogaires occitans de França pensan dels angleses. Es de creire que de còps que i a los nòstres son dopats a la vitamina C coma Colhardisa. Vaicí dos exemples:
Pel gascon Christian Darrouy, los angleses “nos envadín, nos metón ambradas, que cramèn la Joana d’Arc. Per totjamèi, i aurà tostemps enter nosauts ua rivalitat ancestrau”. Lo paure el, li caldriá explicar que la Piucèla de Lorena la vegèron pas jamai en Gasconha e a l’epòca los aujòls del Darrouy tenián puslèu pels angleses. Sens cap de dobte un detalh de l’istòria.
Per René Benesis de Narbona, “Ièu, jamai los poguèri sentir. Pudisson a orguèlh, se mossegan las aurelhas e se prenon pel monilh del Monde”.
Per René Benesis de Narbona, “Ièu, jamai los poguèri sentir. Pudisson a orguèlh, se mossegan las aurelhas e se prenon pel monilh del Monde”.
Vertat es que los franchimands o los que se’n creson coma nòstre lengadocian son d’una modestia proverbiala, dempuèi quauques sègles que los costejam per fòrça n’avèm la pròva cada jorn.
Acabarai per doas nòtas positivas e umoristicas, la primièra del gascon Pierre Albaladejo que ditz que “Que calèva estar anglés entad inventar ua pauma pas redonda, que’us a calut perpensar” e la de Claude Spanghero que declara que “Los angleses inventèron lo rugbi, los autres (sosentendut los occitans) o an bravament melhorat”.
Fin finala, en quauques mots dels pus fins, tot es dit del perqué de l’amor dels occitans per la palma ovala!
Adishatz, monde d’Ovalia, e al còp que ven.
Gèli Grande
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Som en temps dificils e cal haver joves forts per las manis. Los gendarmas van a tupar a los pichonets ,mas gosan pas enfrontar-se amb los forts.
Pels legeires de Jornalet vaqui l'original en francés de las declaracions de
Christian Darrouy
"Ils nous ont envahis, nous ont mis des raclées, ont brûlé Jeanne d'Arc. A perpétuité, il y aura toujours entre nous une rivalité ancestrale"
“nos envadín, nos metón ambradas, que cramèn la Joana d’Arc. Per totjamèi, i aurà tostemps enter nosauts ua rivalitat ancestrau”.
René Benesis
"Moi, j'ai jamais pu les piffer. Ils puent l'orgueil, ils se mordent les oreilles et se prennent pour le nombril du monde."
“Ièu, jamai los poguèri sentir. Pudisson a orguèlh, se mossegan las aurelhas e se prenon pel monilh del Monde”.
Pierre Albaladejo
"Il fallait être anglais pour inventer un ballon pas rond, il leur a fallu gamberger."
“Que calèva estar anglés entad inventar ua pauma pas redonda, que’us a calut perpensar”
Claude Spanghero
"Les anglais ont inventé le rugby, les autres l'ont bien amélioré."
“Los angleses inventèron lo rugbi, los autres o an bravament melhorat”.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari