#Makeamove (fai un movement) es lo nom de la campanha que l’Assemblada Nacionala Catalana (ANC) a entamenat per denonciar internacionalament lo procès contra los independentistas catalans, a causa del referendum d’independéncia que se tenguèt lo 1r d’octòbre de 2017. La campanha es a entamenar divèrsas manifestacions pertot. De soslinhar los acamps reüssits de dimenge passat dind la ciutat de Mexic e a Sant Sebastian, ont de milièrs de personas marchèron jo de parapluèjas jaunes en sosten als independentistas catalans. Ça que la, Brussèlas es venguda l’epicentre car aquí se tròba exiliat lo president Puigdemont e se plaideja lo sosten de l’UE.

De centenats de personas manifestèron dimenge passat davant la gara centrala de Brussèlas dins l’encastre de la campanha #Makeamove. Protestavan contra la tenguda del procès contra los independentistas catalans del temps que plaidejavan lo sosten de l’Union Europèa. Revendicavan la liberacion immediata dels presonièrs politics que son ara jutjats a Madrid e sostenián que “l’autodeterminacion es pas un crime”. Lo fòtojornalista occitan Julien Cazenave, èra sus plaça e n’a mandat un bèl fòtoreportatge a la redaccion de Jornalet.
 
Aquela manifestacion seguissiá l’acamp de protèsta que se tenguèt lo 12 de febrièr passat davant la Comission Europèa, a l’ocasion del començament del jutjament a Madrid. En aquela escasença Cazenave aviá tanben mandat a Jornalet un bèl fòtoreportatge.
 
 
Conferéncia dels presidents Torra e Puigdemont
 
Lo president de la Generalitat de Catalonha en exili, Carles Puigdemont, e lo president en foncions, Quim Torra, faguèron ensems ièr diluns una conferéncia per denonciar lo jutjament que se ten a Madrid. La conferéncia se deviá far inicialament dins lo sèti del Parlament Europèu mas lo president de la cambra, Antonio Tajani, o refusèt per de rasons de seguretat, en seguida de qualques pressions espanhòlas.
 
Julien Cazenave ne parlèt amb lo coordinator de l'ANC a Brussèlas, Ivan Fox:



De matin, Torra rescontrèt lo president de Flandra, Geert Bourgeois, e de ser lo president del parlament flamenc, Jan Peumans.


Chepic dels observaires internacionals
 
Los observaires internacionals, qu’an seguit la primièra setmana de jutjament, coordenats dins lo ret International Trial Watch (ITW), an elaborat un primièr rapòrt sus qualques questions que lor an tirat l’atencion.
 
D’un caire, an avalorat positivament qualques aspèctes formals coma lo temps qu’an agut los avocats de la defensa per dire lors expausats e per que lo tribunal interrompèsse pas los declarants. Mas d’autre caire i a de questions que considèran inquietantas, coma las que trobèron los observaires Alexandre Faro, Dominique Nogueres, William Mozdzierz, Frédéric Ureel, Fabio Marcelli e Javier Pérez Royo just al primièr jorn del jutjament. Eles avián pas cap d’espaci dins la sala d’audiéncia coma observaires e deguèron far fòrça oras de coa a l’exterior per poder intrar coma public. Mas lo fach pus inquietant èra que la coa èra organizada per de membres del partit ultradrechista Vox. L’endeman, après los planhs, la coa l’organizèt la polícia.
 
La sala d’audiéncia a solament quaranta sètis pel public. Pasmens, a cada sesilha i a un desenat de cadièras liuras. Per aquela rason, ITW demanda tornarmai que s’abilite d’espacis pels observaires internacionals.
 
 
 

ATENCIÓN‼ [Hilo]

Valoraciones semanales de @InterTrialWatch:

Las acusaciones no tienen en cuenta que las actuaciones de los acusados pueden estar amparadas por derechos fundamentales. Si así fuera, no sería posible al mismo tiempo que los acusados hubieran cometido delito pic.twitter.com/n8Azsc5jb9

— International Trial Watch (@InterTrialWatch) 18 de febrer de 2019