Un nòu estudi afirma que fa 2,6 milions d’annadas i aguèt pas cap d’escantiment general dins los oceans de la planeta coma èra estat afirmat fins ara. L’aparicion de nòvas espècias e la desaparicion d’autras intrariá dins çò qu’es la vida vidanta de la Tèrra. E entre d’autras espècias lo megalodon, la làmia giganta que fasiá pus de 15 mètres de longor, s’escantiguèt un milion d’annadas abans çò que se pensava fins a uèi.
 
Aital, la paleontologia considerava que fa 2,6 milions d’annadas se produguèt un escantiment general dins los oceans pr’amor d’una supernòva —un cataclisme astronomic—. A l’epòca se seriá tengut l’escantiment de fòrça espècias marinas coma de fòcas, de serenas, de dalfins e de balenas. Amb aquestas se pensava que tanben s’èra escantit Otomus Megalodon, la làmia giganta preïstorica. Totun, de nòvas donadas dison qu’aquò foguèt pas aital.
 
“Es pas de creire que çò que se passèt foguèt un periòde de cambiament de fauna natural, çò confirmèt Robert Boessenecker, cap del nòu estudi realizat per una amassada d’universitats estatsunidencas. Se debanèt un nòu cambiament natural d’espècias e non una catastròfa, que provoquèt pas cap d’escantiment general de la vida marina”.
 
Segon aquel estudi, doncas, l’aparicion de la granda làmia blanca modèrna seriá estada la causa principala de l’escantiment de Megalodon e pas brica una castastròfa. Segon aquò, las primièras grandas làmias blancas apareguèron sus la Tèrra fa 6 milions d’annadas dins l’Ocean Pacific e fa solament 4 milions d’ans ja s’èran espandidas per totes los oceans planetaris.
 
Un escantiment qu’arribèt plan abans. Aquò, segon aqueles paleontològs, seriá estada la causa pus importanta de l’escantiment del megalodon. Segon Boessenecker, “la granda làmia blanca aguèt pro de temps per s’espandir per la planeta e provocar la desaparicion dirècta del megalodon pr’amor de la competicion dirècta per un meteis espaci natural”.
 
Ça que la, divèrses estudis faches abans prepausavan que lo megalodon auriá viscut fins a fa 2,6 milions d’annadas, mas Boessenecker e sa còla poguèron confirmar que s’èra escantit aumens un milions d’annadas abans pr’amor de nòvas donadas fossilas.
 
Dins aquel estudi, los cercaires aurián tornat analisar de donadas de la planeta tota de fossils de megalodon e sustot dels trobats en Bassa Califòrnia e en Califòrnia. Totes los fossils posteriors als 3,6 milions d’annadas poirián aver patit l’erosion pr’amor qu’èran situats dins de jaces pus ancians. E sa preséncia coma espècia viva poiriá èsser sonque demostrada a travèrs dels fossils trapats sus la còsta oèst de l’America del Nòrd, mas pas mai tard. (Legissètz la seguida)



 

---

Aqueste article es  publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.