Una setmana après aver batut lo recòrd del Mond de 800 mètres en natacion liura, l’esportiva niçarda, Camille Muffat, a batut lo recòrd de 400 mètres als Campionats d’Euròpa de Natacion.

Dissabte passat, Camille Muffat batèt un autre recòrd mondial als Campionats d’Euròpa de Natacion que se debanavan a Chartres (França). E mai se uèch jorns abans, l’esportiva niçarda aviá batut lo recòrd del Mond de 800 mètres en natacion liura amb un temps de 8 minutas, 1 segonda, 06 centens, dins l’encastre dels Campionats de França, aqueste còp, a batut lo recòrd dels 400 m en 3 minutas, 54 segondas, 85 centens; aquò es 7 centens de mens que la precedenta melhora performança mondiala.
 
“Soi plan contenta de batre aquel recòrd que l’avián realizat en combinason de poliuretan. Pensi que, uèi, se nadavi amb una combinason, ganhariái quatre o cinc segondas”, çò disiá la campiona occitana dissabte passat. “Èri fòrça près e sentissiái, après aver batut lo recòrd dels 800 mètres, que me deviá aperténer”, çò apondiá.
 
Camille Muffat, l’esportiva niçarda que foguèt campiona olimpica de natacion liura a Londres l’estiu passat, ara es tanben campiona d’Euròpa e recordista del Mond.
 
“Ara per ara”, insistís Muffat; pr’amor qu’ela serà pas als Mondials d’Istambol del 12 al 16 de decembre, ont l’estatsunidenca Allison Schmitt, vicecampiona olimpica dels 400 mètres, li poiriá replicar.