Lo Ministèri de l’Interior francés decidiguèt d’assignar a residéncia a Orlhac (Castanhau), dempuèi lo 15 de febrièr, Kamel Daoudi, condemnat per terrorisme e despossedit del ciutadanatge francés (qu’es lo qu’an los occitans d’aquela region). Ara, es forçat d’abitar dins una ostalariá d’Orlhac e se deu presentar dos còps per jorn al comissariat.
 
Mas lo cònsol màger de la capitala cantalesa, Pierre Mathonier, es pas brica d’acòrdi e ne reclama de comptes al ministre Christophe Castaner dins un corrièr, çò rapòrta La Montagne. Mathonier planh d’èsser pas estat avertit pel ministèri. Tot just recebèt una telefonada de la prefècta del departament dins la setmana precedenta per l’avertir que l’assignat a residéncia seriá desenant albergat dins un ostal orlhagués.
 
“Fàcia a una decision d’una tala importància e sus un subjècte tan sensible coma lo terrorisme, me sembla que lo cònsol màger de la comuna auriá pogut èsser consultat”, çò deplora Mathonier dins son corrièr adreiçat al Ministre de l’Interior francés lo 19 de febrièr passat. “Davant lo fach complit e sens cap d’informacion prèvia, devi gerir una ànsia comprensibla de la populacion orlhaguesa. Aquesta situacion, ont pòdi pas portar cap d’element als orlhagueses sul contèxt e las decisions qu’an prevalgut a aquela arribada, es inacceptabla e inconfortabla”, çò apond lo cònsol cantalés.
 
 
França ensagèt de l’expulsar devèrs Argeria
 
Kamel Daoudi èra acusat d’èsser responsable d’un atemptat a l’ambaissada dels Estats Units a París en junh de 2001. Interpelat a Londres en setembre d’aquel an, se declarèt colpable davant la justícia francesa. En 2006 foguèt condemnat a sièis ans de preson, mas foguèt liberat en abril de 2008 en rason de las annadas d’encarceracion ja efectuadas. Dempuèi 2008 foguèt assignat a residéncia, forçat per l’estat de demorar dins una ostalariá en Charanta Maritima, a 450 km de sa familha. Ara, es constrench d’abitar dins una ostalariá d’Orlhac.
 
Lo govèrn francés ensagèt de l’expulsar devèrs Argeria, mas la Cort Europèa dels Dreches Umans o rebutèt en 2009 en rason del risc de tortura dins aquel país, qu’el aviá quitat quand aviá cinc ans.
 
E mai s'admet colpable, Daoudi se reconeis pas pus jihadista. “L’islamisme me definís en partida, mas pas entièrament. Demòri en França dempuèi l’edat de 5 ans, e me maridèri amb una francesa de soca, filha d’un oficièr decorat mai d'un còp, e avèm agut tres enfants”, çò explicava l’an passat. “Quand èri jove, las intervencions en Afganistan, en Libia o en Iraq creavan una forma d’umiliacion extrèmament malsana”, çò justificava. “Aviái de dificultats familialas e professionalas, e partiguèri en Afganistan sus un còp de cap, i restèri quatre meses”.

 

Atterrant... La place de ce terroriste étranger n'est pas dans un hôtel à Aurillac mais hors de France !https://t.co/385Bux4wDX

— Laurent Wauquiez (@laurentwauquiez) 24 de febrer de 2019