Los ensenhaires de Los Angeles son en cauma illimitada dempuèi la mitat de genièr. S'agís d'environ 30 000 caumaires que revendican lo melhorament de lors condicions del trabalh, de lors salaris e l'engatjament de mai d'efectius. L'arrèst tòca almens 640 000 escolans. Lo cònsol màger de la vila, Eric Garcetti, sosten los caumaires e se declara “fièr” d'eles e de lor mobilizacion.
 
L'èrsa de caumas d'ensenhaires als Estats Units comencèt l'an passat en Virginia Occidentala e las revendicacions son nombrosas dont las antiracistas e las de justícia sociala. Cal tanben dire que  los ensenhaires se senton pas pus representats pels sindicats tradicionals. Lor tòca es pas solament l'aumentacion dels salaris mas l'egalitat territoriala, sociala e raciala dels escolans.
 
Per ara, los ensenhaires de Los Angeles an daverat un bon engatjament de l'administracion: una aumentacion del salari d’un 6%, una infermièra a temps plen dins cada escòla, de programas socials pels enfants mai desfavorizats...
 
De soslinhar que los ensenhaires estatsunidencs protèstan energicament contra un modèl neoliberal de l'educacion, parièr al que la reforma Blanquer vòl impausar en França e qu'una de sas nombrosas consequéncias inumanas es la desaparicion de l'occitan de l'educacion publica.
 
Per ne saber mai, recomandam l'article de Magally Miranda Alcázar entitolat “Red for Ed in LA” e publicat dins la revista Commune. Ne podètz trobar la traduccion en francés dins la revista Jef Klak entitolada:  “Los Angeles 2019 : la révolte des lycées, un mouvement tenace et victorieux pour l’école publique”.