Es partits sobeiranistes son majoritaris, en tot obtier 87 sètis d’un totau de 135 qu’a eth Parlament de Catalonha.

Eth president Artur Mas qu’a ratificat era victòria dempús d’ues eleccions convocades en clau de plebiscit sus eth dret a decidir. Era coalicion catalanista de centredreta Convergència i Unió (CiU) qu’a perdut 12 deputats e li calerà pactar, probablaments, damb Esquerra Republicana de Catalunya (ERC), que ven era dusau fòrça. ICV-EUiA, es ecosocialistes tanben partidaris deth dret a decidir, qu’an obtengut 13 deputats e era Candidatura d’Unitat Popular (CUP), era quèrra independentista, assambleària e anticapitalista, qu’a hèt irrupcion en Parlament de Catalonha damb 3 deputats.
 
D’entre es partits espanholistes, eth Partit dels Socialistes de Catalunya (PSC), federalistes, qu’an perdut 8 deputats. Eth Partit Popular (PPC) qu’a guanhat un deputat e Ciudatans (C’s), partit que critique eth nacionalisme catalan damb un fòrt nacionalisme espanholista, qu’a triplat era sua representacion en Parlament.
 
Totun, es partits sobeiranistes son majoritaris, en tot obtier 87 sètis d’un totau de 135 qu’a eth Parlament de Catalonha.
 
 
Ena Val d’Aran
 
Coma ei normau, b’ei en país occitan a on eth vòte sobeiranista e ei mès baish. Enes eleccions de 2010 es fòrces catalanistes somauen era mitat des vòtes deth temps qu’en aguestes eleccions an baishat apròp de 45%.
 
Enguan, es partits majoritaris (CiU e PSC) qu’an experimentat ua considerabla devarada, deth temps qu’an pujat considerablaments es partits espanholistes PP e C’s, e es partits catalanistes ERC, ICV-EUiA. Era CUP qu’ei tanben estada votada per 1,34% des aranesi.
 
Era participacion enguan qu’ei estada recòrd; 63,53% en Aran. En Catalonha tota qu’ei estada de 69,65%.
 
 
Reaccions des candidats
 
“Era situacion non ei cap aisida mès qu’anaram tà deuant”, ce didec Artur Mas en saber es resultats electoraus. Eth president de Catalonha que remerquèc tanben era majoritat independentista en Parlament e que s’engatgèc a amiar entà deuant eth referendum entar estat pròpri pendent era pròplèu legislatura. “Enquia ara auem anat fòrça solets, ara, era gent a dit que volie qu’anèssem mès acompanhadi”, ce ahigec Mas en tot arreconéisher que cau trabalhar entà agranir es partidaris der estat pròpri.
 
Deth sòn costat, eth cap de lista d’ERC, Oriol Junqueras ce declarèc qu’eth sòn partit e “serà ath nivèu dera sua responsabilitat”.
 
Eth PSC qu’a trèt eth pejor resultat dera sua istòria, “pejor de ce que volíem” ce arreconeishec eth candidat Pere Navarro.
 
Eth candidat des ecosocialistes d’ICV-EUia, tanben partidaris deth dret a decidir des catalans, qu’afirmèc que mès que jamès s’ei vist que “Catalonha non ei CiU”, e ath madeish temps ahigie qu’“Artur Mas e “non merite eth sosten des quèrres”, en tot hèr allusion ara politica de retalhades e reduccions budgetàries qu’a amiat a tèrme eth govèrn catalan enes dus darrèri ans.
 
Eth partit independentista Solidaritat per la Independència (SI), qu’a perdut era sua representacion en Parlament. Per contra, era CUP que i a hèt irrupucion damb tres deputats que seràn "eth shivau de Tròia des classes populares" segontes ce que didèc eth sòn candidat David Fernández.




Ferriòl Macip