Una dròlla d’11 ans, victima d’un viòl, foguèt obligada d’enfantar malgrat que volguèsse avortar. Lo sospechat violaire es lo companh de sa menina, e es en preson. Aquò se passèt dins lo nòrd-oèst d’Argentina, dins la província de Tucumán.
 
Quan se coneguèt l’afar, de fonts judiciàrias raportèron que permetrián que la filha avortèsse, car un protocòl de 2012 o autoriza pels cases de viòl e quand la santat de la maire es en perilh. Mas lo govèrn provincial anoncièt puèi que caliá salvar la vida del fètus e obliguèt lo sistèma de santat de Tucumán de practicar una cesariana sus la mainada, qu’èra a sa 24a setmana de gestacion.
 
Per ara, avèm pas d’informacion sus la santat de la maire ni mai de l’enfanton. “Aquela filha anèt al sistèma public de santat, acompanhada de sa maire, per sollicitar l’avortament e diguèt explicitament qu’aquò èra sa volontat, mas l’an internada dins l’espital de Tucumán e doncas nosautres disèm qu’es, de qualque biais, sequestrada pel sistèma de santat”, çò declarèt als mèdias María Alicia Gutiérrez, que fa partida de la Campanha Nacionala pel Drech d’Avortar. “Non solament a ensajat dos còps de se suicidar, mas tanben sa santat es en perilh”, çò precisèt.
 
En agost passat, lo Senat d’Argentina bloquèt la legalizacion de l’avortament en tot manténer en vigor una legislacion de 1921.
 
 
Una campanha de protèsta
 
E mai los sectors pus conservators se sián inquietats mai que mai per la subrevivéncia de l’embrion, una vasta partida de la societat locala es esglasiada del patiment de la gojata que, malgrat un viòl, a pas pogut avortar e a subida una cesariana, a 11 ans!
 
S’es entamenada una campanha de protèsta sonada “Niñas, no madres” (mainadas, non pas maires) qu’a daverat un larg sosten de la societat d’Argentina e d’endacòm mai. Una pagina Facebook denóncia lo cas, del temps que sus Twitter, de femnas an començat de publicar de fòtos loras quand avián 11 ans.
 
Revendican que las autoritats agiscan per evitar las violéncias sexualas e las maternitats forçadas.