Èsser recebut dins un comèrci o una entrepresa dins la lenga del país es una situacion que voldrián viure totes los locutors de lengas minorizadas! D’ara enlà aquò es possible en Bretanha pels locutors de breton. Dins de mai en mai de comèrcis o d’entrepresas bretonas i a de messatges britofòns. Fins ara los locutors se reconeissián gràcias a l’spilhennig, çò es l’espilleta en forma d’èrsa que foguet lançada en 2007 per l’Ofis ar Brezhoneg e que permet als locutors de breton de se reconéisser entre eles.
 
Mas aquò èra pas sufisent pel movement breton. Pr’amor d’aquò foguèt creat lo sit stal.bzh (botiga) dins lo qual se tròban totas las entrepresas que pòdon recebre lors clients en breton. Sus cada ficha d’entrepresa que se tròba sul sit i a un indicador que precisa lo nivèl de coneissença de la lenga dins un reng d’1 a 4.
 
A l’ora d’ara i a una desena d’entrepresas repertoriadas. L’8 de junh serà lançada una aplicacion per trobar totas las botigas qu’utilizan la lenga a l’entorn.
 
Aquel sit es estat creat per Mignoned ar Brezhoneg (los Amics del Breton), una associacion procha d’Aï’ta.
 
 
 
 
Fabien Lécuyer
 
 
 

---

De vesitar stal.bzh.