Jorge Correa, dich Boro, es jornalista del sit d'informacions La Haine, un projècte iberic de desobesissença informativa e de revolucion sociala. Quand anava devèrs Veneçuèla per participar coma jornalista a l'Assemblada Internacionala dels Pòbles, lo detenguèron en Panamà, ont ja l'esperavan. Après 22h de detencion lo remandèron en Euròpa. Lo jornal basco Hala Bedi ne rapòrta los detalhs qu'avèm adaptats en occitan dins l'article que seguís.

“Escrivi de l’avion de retorn a París après èsser abordat per la Polícia Aeroportuària de Tucumén (Panamà) e èsser retengut unas 22 oras dins l’airal d’espèra de migracion quand anavi a Caracas per cobrir coma jornalista l’Assemblada Internacionala dels Pòbles. Soi estat deportat”. Atal o explicava sus Twitter lo jornalista de La Haine, Jorge Correa dich Boro, lo matin del dimars 26 de febrièr.
 
Segon çò qu'explica, l’esperavan a la pòrta d’embarcament per Caracas. A aquel moment, l'interroguèron sus las acusacions que lo jornalista aviá patidas dins l'estat espanhòl e tanben li demandèron se fasiá partida o èra simpatizant d'ÈTA. “M'an tirat l'ordenador, los telefòns mobils...”, çò comentava.
 
El denóncia que, mentre que dins l'airal d'espèra de migracion passavan environ 25 o 30 personas pendent la jornada, lo jornalista de La Haine foguèt lo sol que li prenguèron los telefòns e l'ordenador. “M'an pas permés de comunicar amb l'ambaissada fins a uèi, 25 de febrièr a 19h30 (ora de Panamà)”.
 
Sembla que las autoritats panamencas respectèron pas la condicion de jornalista mandat especial internacional. “La sola tòca èra de m'expulsar per que raportèsse pas l’Assemblada Internacionala dels Pòbles ni mai qu'arribèsse en Veneçuèla”.
 
Dins aquel sens Boro a volgut denonciar l'estat de Panamà per çò qu'el considèra “una flagranta violacion dels dreches umans e del drech a la libertat d'expression e de premsa, perque m'esperavan particularament per far una deportacion amb la tòca d'empachar que La Haine raportèsse de primièra man sus Veneçuèla”.
 
E conclutz: “Vòli veire que totes aqueles que fa qualques setmanas se solidarizavan amb los jornalistas d’EFE que foguèron expulsats de Veneçuèla per èsser intrats dins una zòna de seguretat maximala sens s'acreditar, denóncien mon cas, denóncien l’estat de Panamà e denóncien aquelaa flagranta violacion de dreches”.
 
 
 
 
<hr align="left" size="1" width="33%" />
Aqueste article es estat publicat originalament en espanhòl sus Hala Bedi e en catalan sus Directa.
 
 
 
 
<br /><br /><a href="https://www.jornalet.com/socis" target="blank"><img alt="abonar los amics de Jornalet" id="Abonar los amics de Jornalet" src="https://www.jornalet.com/imatges/images/SOCI.jpg" /></a>