Actualitats
Torneg de Sièis Nacions de 2019 de rugbi de XV: segonda pauseta entre doas jornadas
Lo Torneg de las 6 Nacions torna dins l'actualitat d'Occitània. Per aquela rason, mentre que se tendrà aquela competicion, Jornalet publicarà cada dimars la cronica de Gèli Grande qu’auretz pogut escotar cada diluns sus Ràdio Lenga d’Òc.
OPINION
Dempuèi la debuta de l’edicion 2019 del Torneg, d’auditors de Radiò Lenga d’Òc e de legeires de Jornalet me questionèron e los grandmercegi. N'ai retengut doas opinions.
La primièra de l’escaisnom Mèfi! 31 que ditz plan justament qu'“Aquel torneg oculta la nacion occitana jos l'esquipa de França... Assimilacion inconscienta o volontària?” e la segonda del chafre M C que pensa que “los occitans de França”, “los Blaus occitans” es "un polit exemple d’autopersuasion.”
Es l’escasença de ramentar de faches plan importants:
— Dempuèi 1906, data del primièr rescontre internacional de rugbi de quinze jogat per una esquipa pretenduda de França, los occitans i son totjorn estats tras que majoritaris amb de quora en quora de bascos del nòrd o de nòrd-catalans e encara mai escassament de franchimands, de parlaponchuts, qué …
— Dempuèi 1881 e las leis francesas de Jules Ferry, los occitans de l’estat francés son principalament escolarizats dins la lenga del poder politic de París e aprenon sonque l’istòria oficiala de França. E los jogaires de rugbi escapan pas al formatatge escolar. Quitament s'a l’ostal parlan o parlavan e ausissián o ausisson parlar occitan, dins lo cap son de franceses ni cort ni costièr, coma diriá un cèrt Frederic Mistral.
— Dempuèi 1881 e las leis francesas de Jules Ferry, los occitans de l’estat francés son principalament escolarizats dins la lenga del poder politic de París e aprenon sonque l’istòria oficiala de França. E los jogaires de rugbi escapan pas al formatatge escolar. Quitament s'a l’ostal parlan o parlavan e ausissián o ausisson parlar occitan, dins lo cap son de franceses ni cort ni costièr, coma diriá un cèrt Frederic Mistral.
La consequéncia d’aquò es que la pretenduda Federacion Francesa de Rugbi bailejada per d’occitans cap e tot francizats, passa son temps a romegar que lo nòstre espòrt es tròp regional.
Quand fan de rugbi (o de quauque autre espòrt), los occitans de França renègan lor identitat lingüistica e culturala del temps que los angleses, los escoceses, los irlandeses e los galeses l’assumisson… vos parli pas dels italians.
Quantes de clubs situats fòra Occitània, La Rochèla, LOU, RCF, Stade Français o mai recentament Nivèrns se bastisson una esquipa en tot saber que lo rugbi es ancorat en Occitània? Se venon servir e tot lo monde tròban aquò normal que i aja un rugbi occitan fòra sòl.
Es vertat tanben que dins l'esquipa dels occitans de França d’aquesta passa n’i a que son pas d’origina occitana perque los aujòls venguèron d’ancianas colònias francesas d’Africa o d’Asia. Totun, ont fan de rugbi? Dins de clubs enrasigats en Occitània. Se son bons, es normal que sián causits s’an pas d’autres engatjaments endacòm mai.
Doncas, escriure o dire “los occitans de França” o “los Blaus occitans”, es pas d’autopersuasion. Es la realitat. Es pas perque parlan pas pus que francés —generalament amb una brava punta d’accent de bon reconéisser— qu’un occitan o es pas mai.
Adishatz, monde d’Ovalia, e al còp que ven.
Gèli Grande
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari