Qualques centenats de milièrs de personas (entre 200 000 e 250 000 segon las fonts) passèron per carrièras dissabte passat a Milan contra lo racisme dins una manifestacion dobèrtament antigovernamentala. Los manifestants seguissián la crida d’una trentena d’associacions e sindicats jos lo lèma “primièr las personas” en responsa als eslogans xenofòbs que dison “los italians primièr”. An manifestat contra lo racisme e contra tota mena de discriminacion e per poder aculhir de migrants, fàcia a las politicas xenofòbas de l’actual govèrn del país.
 
De cortègis desparièrs convergiguèron pacificament davant la catedrala de Milan dins un ambient festiu. A la fin se legiguèt un manifèst ont se critiquèt “la politica de la paur e la cultura de la discriminacion” qu’impausa actualament lo govèrn italian. Dins aquel sens se reclamèt “l’inclusion sociala, l’egalitat d’oportunitats e una democracia reala per un país sens discriminacion, sens murs e sens barrièras”.
 
Participèt a la protèsta lo cònsol màger de Milan, Giuseppe Sala. “Es un moment de grand cambiament social pel país, e aqueste es nòstra vision d’Itàlia. Un caireforc per la societat, entre l’obertura e la barradura, entre qualque pantais autarquic amb l’idèa de transmetre solament de cançons italianas a la ràdio e una idèa internacionala”, çò diguèt Sala als mèdias.
 
I aviá maites elegits presents dont lo president de la region de Laci, que planguèt que l’actitud del govèrn actual del Movement 5 Estelas e la Liga “[ foguèsse] a propagar fòrça òdi, rancor e division”.

 
 

More than 200,000 people protest Italy's far-right government.

So proud of my countrymen & women: this is the biggest demonstration against racism & xenophobia to date in #Milan#PrimaLePersone#Europe#ValuesMatter  #MarchForOurFuturepic.twitter.com/8jA39qW3xt

— Rula Jebreal (@rulajebreal) 2 de març de 2019