L’Audiéncia Nacionala espanhòla (un tribunal d’excepcion especializat dins los crimes de terrorisme) a ratificat las condemnas dels uèch joves d’Altsasu (Bascoat), sèt gojats e una gojata, condemnats per atemptat a l’autoritat e trebol de l’òrdre public en seguida d’una bagarra nocturna de bar que i participèron dos policièrs de la Gàrdia Civila sens unifòrme que foguèron nafrats. Segon lo tribunal, la bagarra constituís los delictes d’atemptat contra d’agents de l’autoritat, de lesions, de trebol public e de menaças. Per contra, los jutges negligisson l’acusacion de terrorisme que lo ministèri public aviá tornat demandar. Enfin, la justícia espanhòla manten la senténcia prononciada en junh passat, amb de penas d’entre 2 e 13 ans de preson.
 
Segon los arguments de l’Audiéncia Nacionala espanhòla, l’incident foguèt pas una bagarra de bar mas los joves ataquèron los agents pel fach d’èsser d’agents de la Gàrdia Civila. Atal se manten las condemnas contra Oihan Arnanz a 13 ans de preson, contra Jokin Unamuno e Adur Ramírez de Alda a 12 ans, contra Jon Ander Cob, Julen Goikoetxea e Aratz Urrizola a 9 ans e contra Ainara Urkijo a 2 ans. Dins lo cas d’Iñaki Abad e d’Oihan Arnanz, los an tanben condemnats per trebol de l’òrdre public. Solament dins lo cas d’Iñaki Abat los jutges reduson la pena de 13 a 6 ans de preson, car la senténcia lo condemnava per dos delictes de lesions qu’el n’èra quitament pas acusat. Las defensas dels joves pòdon recórrer ara contra la senténcia davant la Cort Suprèma espanhòla, qu’es lo tribunal de darrièra instància qu’ara jutja los independentistas catalans.
 
La cort a refusat un còp de mai de considerar que se tractava d’una bagarra de bar o d’un pichon incident o d’una garrolha, coma afirman los avocats dels joves, mai que mai perque los policièrs èran a beure un còp sens portar l’unifòrme.
 
Los faches se passèron lo 15 d’octòbre de 2016, a cinc oras del matin. Se tenguèt alavetz una bagarra nocturna de bar dins la vila d’Altsasu (Bascoat) ont dos agents de la Gàrdia Civila sens unifòrme e lors companhas foguèron nafrats. Lo ministèri public acusèt de terrorisme los sèt jovents e la joventa ara condemnats. Eles son empresonats dempuèi lo 14 de novembre de 2016.
 
La senténcia es fòrça impopulara, coma se demostrèt en junh passat, quand 80 000 personas marchèron per las carrièras de Pampalona per la libertat dels uèch jovents.
 
Los parents dels joves en preson prepausan la creacion d’una plataforma per la regeneracion democratica e la separacion de poders. Vòlon defendre la “qualitat democratica e los dreches umans” e revirar la situacion actuala que considèran injusta.
 
 
 
 
 

Declaraciones de la plataforma #AltsasukoakASKE valorando la sentencia. "La AN ha perdido la oportunidad de acercarse a lo que la mayoría de esta sociedad entiende como #justicia. Cada día que pasan los 7 jóvenes en prisión es una aberración. Seguiremos movilizándonos". pic.twitter.com/erKSi5JqQP

— Altsasu gurasoak (@Altsasugurasoak) 7 de març de 2019