Lo raportaire public de la cort administrativa d’apelacion de París recomandèt diluns passat, 11 de març, l’anullacion de la privatizacion parciala de l’aeropòrt de Tolosa Blanhac. Lo raportaire considèra que “i aguèt un vici substancial” dins la procedura de causida de l’accionari. En abril de 2015, l’estat francés vendèt per 300 milions d’èuros lo 49,9% de l’aeropòrt tolosan a un consòrci chinocanadenc. Emmanuel Macron, alavetz ministre de l’economia, diguèt qu’èra pas una privatizacion mas una “dobertura del cabal”.
 
Segon l’avocat de tres sindicats opausats a la privatizacion de l’aeropòrt de Blanhac, l’ofèrta finala la faguèt sonque lo crompaire, çò que respectariá pas la procedura de privatizacion, segon France Info. “Lo raportaire public confirma nòstra analisi, lo quasèrn de las cargas es estat respectat”, çò precisa l’avocat. “Es pas encara la victòria mas una avançada significativa”.
 
L’anóncia del raportaire public arriba just al moment ont los accionaris ensajan de se desengatjar de lors parts de l’aeropòrt en las vendent.
 
Lo collectiu antiprivatizacion Solidaris 31 a aviat una accion davant lo tribunal de comèrci de París per que lo consòrci chinocanadenc “partisca pas amb la caissa” en cas de venda.