Una larga majoritat de representants politics alsacians an aprovat de prepausar la conversion del país en una collectivitat territoriala e de fusionar sas tres cambras. La reforma permetriá a l’Assemblada d’Alsàcia d’assumir de competéncias reglamentàrias, mas non pas legislativas. Los ciutadans son apelats a votar lo cambiament a las urnas en abril que ven.

Amb una larga majoritat (108 vòtes en favor sus un total de 122), los representants politics alsacians an aprovat una resolucion que deuriá dobrir lo camin per l’unificacion administrativa d’Alsàcia amb un començament timid d’autonomia. Las assembladas de la region d’Alsàcia e dels departaments del Naut Ren e del Bas Ren, amassadas en congrès dissabte passat, aprovèron lo principi de lor fusion en una nòva collectivitat territoriala d’Alsàcia: seriá una forma d’organizacion territoriala qu’autrejariá un pauqueton d’autonomia, a respècte d’una region de regim comun. De fach, una de las principalas tòcas declaradas dins lo tèxt es d’assumir “de transferiments de competéncias”, a l’ora d’ara exercidas per l’Estat francés.
 
La proposicion ven de luènh: fa un an, los representants alsacians aprovèron una resolucion similara. En setembre passat, París assegurèt qu’escotariá la demanda alsaciana. Ara, las cambras de representants d’Alsàcia an renovelat la revendicacion e i an mes de causas concretas. D’un costat, vòlon que lo procès se debane dins l’encastre de la lei de descentralizacion que lo govèrn socialista prepara. De l’autre costat, an facha una lista d’aqueles airals ont vòlon assumir de competéncias: cooperacion transfrontalièra, economia e innovacion, educacion, cultura e patrimòni, gestion dels fonzes europèus, lenga, abitatge. Atanben, demandan una “capacitat reglamentària” per adaptar las leis francesas a la realitat alsaciana.
 
Fins ara, la sola collectivitat territoriala francesa amb un estatut especial, en Euròpa, es Corsega. Son assemblada a de poders reglamentaris (non legislatius), pòt demandar la modificacion de legislacions francesas qu’afècten Corsega (mas las pòt pas cambiar) e a lo drech d’èsser consultada suls projèctes de lei que compòrten de disposicions especificas per l’illa.
 
Dins la resolucion, lo congrès dels representants prevei d’organizar d’una consulta populara que valide l’unificacion de las tres administracions alsacianas e la demanda d’un començament autonomia. Lo vòte se debanarà lo 7 d’abril que ven.
 
 
Sosten transversal
 
Segon çò qu’explica l’AFP, demest los 108 vòtes en favor de la resolucion, i a agut los 85 de l’Union per un Movement Popular (UMP) qu’es majoritària en Alsàcia, e mai los 10 dels ecologistas e los 5 del Front National. Lo vòte socialista es estat fòrça dividit: 8 se son prononciats en favor, 5 an votat contra e 9 se son abstenguts. Entre los socialistas critics, l’idèa s’estend que lo cambiament portarà pas cap d’estalvi. Per contra, l’UMP crei que l’unificacion administrativa permetrà d’evitar qualques duplicitats e, aital, d’aver mai de ressorsas per las destinar a de politicas socialas, sens qu’aquò implique d’aumentar las taxas. En mai d’aquò, entre los socialistas mens amics de l’autogovèrn (e mai s’es fòrça limitat, coma es lo cas), lor agrada pas brica l’idèa qu’un territòri coma Alsàcia se pòsca dotar de qualques instruments un pauc autonomics. Es lo cas del deputat Armand Jung, qu’a dich quitament que la proposicion de l’UMP fariá venir Alsàcia una sòrta de “Sud Tiròl”, en tot se referir a aquel territòri autonòm de la Republica Italiana.
 
 
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.