La dètz e ochena Conferéncia de l’ÒNU sul Cambiament Climatic se fa dins lo país qu’emet mai de gases contaminants per abitant

De delegacions de 195 païses son amassadas dempuèi dimars passat a Al Dawha (Qatar), dins la Conferéncia de l’ÒNU sul Cambiament Climatic (CÒP18), amb l’idèa d’accelerar las iniciativas per redusir a escala mondiala los gases d’efièch de sèrra, que causan lo rescalfament de la Tèrra.
 
Pendent doas setmanas, de representants governamentals, de l’indústria, d’organizacions environamentalas e mai d’instituts de recèrca discutiràn sul cambiament climatic dins lo país qu’emet mai de gases contaminants per abitant.
 
Per la responsabla del cambiament climatic de l’ÒNU, Christiana Figueres, lo congrès d’Al Dawha es tant important coma los autres que se son faches sus la question, e doncas espèra que ne sòrtan de proposicions sus la politica d’emission de gases dels païses participants. “Los govèrns se son meses d’acòrdi qu’èra imprescindible de se manténer en dejós dels dos gras de creissença de la temperatura mejana mondiala, per evitar los impactes piègers del cambiament climatic. Mas sabon qu’aquò se pòt pas capitar sens una transformacion radicala de la produccion d’energia e de l’usatge que se’n fa.”
 
Figueres crei tanben que los govèrns ne sortiràn amb una planificacion de las datas per complir l’acòrdi, qu’establís l’adopcion d’un plan comun en 2015, devent intrar en vigor en 2020. En çò que tanh a l’economia, la prevision dels païses es de dispausar de qualques 100 milards de dolars per poder avançar dins aquel programa. “Una responsa mai rapida al cambiament climatic fa besonh e es possibla, tant tocant la politica internacionala coma tocant l’aumentacion d’accions a l’escala de la politica estatala. A Al Dawha, se cal assegurar que la responsa s’accelère”, çò diguèt la responsabla de l’ÒNU.
 
Al delà dels objectius mençonats per Figueres, dins la Conferéncia del Clima de l’ÒNU, se discutirà tanben sus los acòrdis capitats dins los congrèsses precedents, coma lo Plan d’Accion de Bali (que defend la tecnologia per redusir l’impacte dels gases) o coma de projèctes d’infrastructuras sostenablas.
 
Dempuèi dètz ans, Qatar a lo recòrd d’emissions de CO₂ per abitant: 44 tonas segon las donadas de l’ÒNU de 2009. Aquò es mai de tres còps la quantitat dels Estats Units e 6 tonas de mai que China.
 
Ça que la, Al Dawha signèt lo protocòl de Kyoto, que limita las emissions de gases d’efièch de sèrra, mas, ja qu’èra un país en procès de desvolopament al moment de la ratificacion, se li impausèt pas cap d’objectiu de reduccion.