Divendres passat, un atemptat terrorista contra doas mosquetas a Christchurch, en Nòva Zelanda, esmoguèt lo mond entièr. Amb un tragic bilanç de 50 personas mòrtas e un grand nombre de personas nafradas. L’assalhidor, Brenton Tarrent, d’ideologia ultradrechista islamofòba, retransmetèt lo crime en dirècte suls rets socials. Qualques minutas abans, aviá difusat un manifèst entitolat Lo grand remplaçament. Devèrs una nòva societat ont expausava son ideologia d’extrèma drecha. Tanben sus las armas qu’empleguèt èran escriches de noms e de datas qu’evòcan de faissistas coneguts e de batalhas contra Al Andalus e l'Empèri Otoman.
 
 
Inspirat per Renaud Camus
 
Dins son manifèst, inspirat per l’assagista xenofòb Renaud Camus, lo terrorista parla de “pòbles europèus remplaçats” per de populacions non europèas immigradas. Lo tèxt es redigit coma se foguèsse una autoentrevista ont Tarrent se definís coma faissista, pren China coma “modèl de valors politicas e socialas” e espèra de “recebre lo prèmi Nobèl de la Patz, coma Nelson Mandela”. Es tanben dins aquel escrich que lo terrorista afirma avèr percebut “l’invasion de França per los non-blancs” dins un viatge dins l’Exagòn. Tarrent assolida tanben qu’el asira pas los musulmans que vivon dins lors païses, mas si los que venon devèrs “nòstras tèrras per nos remplaçar”.
 
“Es un sojorn en França que decidiguèt Brenton Tarrent a cometre un atemptat islamofòb”, çò ditz Pascal Boniface sus son compte de Facebook. “Aquò nos deuriá far chifrar sus la natura isterica de nòstres debats tre que l’islam es en causa. Aparentament, d’unes son lèstes per perseverar”, çò apond lo director de l’Institut francés de Relacions Internacionalas e Estrategicas.
 

 
D’efièch, lo terrorista argumenta sa radicalizacion en assegurant que los franceses son una minoritat dins qualques vilas e que “los envasidors son en França tota”. El afirma aver estat frapat per “l’invasion” de las vilas de l’estat francés per d’immigrants e parla del “desespèr” qu’a suscitat en el la victòria de Macron al segond torn de la presidenciala francesa fàcia a Marine Le Pen. “Ganhèt l’èx-banquièr internacionalista, globalista, antiblanc. La vertat de la situacion politica en Euròpa èra, subran, impossibla d’acceptar. Mon desespèr se refortiguèt. Ma cresença en una solucion democratica desapareissiá”, çò afirma lo manifèst de l’assalhidor.
 
 
Benesit pels Templièrs
 
Dins aquel tèxt, lo murtrièr tanben assegura qu’el fa pas partida de cap d’organizacion e que degun li comandèt pas de far lo masèl, mas qu’el demandèt la benediccion dels Cavalièrs Templièrs e l’obtenguèt. Tanben ditz que fasiá dos ans que planificava l’atac, mas que fa sonque tres meses que decidiguèt que aguèsse luòc a Christchurch.
 
Enfin, pel terrorista, d’aucir d’enfants “es pas èsser un monstre perque vendràn adultes e se reproduiràn e nos remplaçaràn”.
 
 
Se compara amb Nelson Mandela
 
Per quant a l’eventuala pena de preson que la poiriá aver, Tarrent ditz qu’espèra pas d’èsser liberat, mas si espèra de daverar lo prèmi Nobel de la Patz coma Mandela. “Lo terrorista Mandela, un còp que sas gents aguèron obtengut la victòria e qu’el aguèt pres lo poder, foguèt liberat. Espèri de sortir de preson dins 27 ans, lo meteis temps que i passèt Mandela pel meteis delicte”.
 
Trump, simbòl de l’identitat blanca renovelada
 
Tarrent se considèra pas nazi, ni mai antisemita, mas intolerant e faissista. Per el, China es “un modèl de valors politicas e socialas” e se compara al fondador de l’Union Britanica dels Faissistas, Sir Oswald Mosley.
 
En mai d’aquò, sona tanben Donald Trump “ lo simbòl de l’identitat blanca renovelada e de l’intencion comuna”.