Dimars passat, de sindicats coma la CGT, FO, Solidaris o l’FSU organizèron dins l’estat francés de caumas e de protèstas interprofessionalas que lor centre èra lo poder de crompa. Pasmens, las accions pertoquèron mai que mai l’ensenhament public, e en particular las escòlas primàrias, de còps completament barradas, en denonciant pas sonque los salaris, totun gelats dempuèi de decennis e desconnectats de l’inflacion.
 
Se los professors d’occitan protestavan ja contra la menaça de desaparicion de la lenga nòstra dins los licèus, fa qualques setmanas que los ensenhaires de l’estat francés e de la màger part d’Occitània començan de se mobilizar contra la politica educativa generala del ministre Blanquer. S’inquietan del projècte de lei de l’Escòla de la Fisança que lor poiriá enebir d’exprimir quina critica que siá de l’Educacion dicha Nacionala, en privat coma en public, amb l’espandiment a totes los agents de l’Estat del dever de resèrva fins ara sonque obligatòri pels directors, inspectors e nauts foncionaris.
Tanben l’idèa de recampar en d'Establiments Publics dels Sabers Fondamentals collègis e escòlas primàrias risca de far desaparéisser de fach tota autonomia d’aquestas. Se denóncia, en mai d’aquò, la volontat de remplaçar de professors experimentats per de contractuals o d’estudiants non qualificats e mal pagats, d’obligar las comunas de pagar d’escòlas mairalas privadas, de multiplicar la concurréncia entre las disciplinas e los professors. Los ensenhaires, enfin, s’esglàsian de la reforma del licèu, qu’impausa de causidas d’especialitats que fan perilhar de disciplinas e fòrçan d’escolans, que sabon pas pus qué triar pels estudis avenidors, de cambiar d’establiment escolar, de còps privat.
 
Espelit coma los Gilets Jaunes sus Facebook, lo grop dels Estilos Roges recampa las revendicacions dels professors, que prepausan d’accions fòrtas e mediaticas.


 
 
Qualques accions fòrtas en Occitània
 
En mai de las caumas e del barrament de fòrça escòlas primàrias pertot al país, se pòt soslinhar que de professors de Montpelhièr aculhiguèron lo ministre amb los crits de “Blanquer, demission!”. A Tolosa, d’ensenhaires s’encadenèron al cledat del rectorat e se faguèron aspergir de gas lacrimogèn pels policièrs. En Tricastin, per exemple, los professors de la ciutat escolara Gustave Jaume an mandat de letras de demission collectiva e de refús d’èsser professors principals a la rintrada 2019, en se fasent fotografiar amb un riban adesiu sus la boca, e s’i parla, coma dins d’autres establiments de l’estat francés, de boicotar los examens de fin d’an.
 
 

 

 

 

#stylosrouges#Greve19mars#19mars#Blanquer#Bordeaux#CGT#GiletsJaunes#FonctionPublique#syndicats#greve Le cortège est maintenant à Merdiadeck, toujours une très bonne ambiance et beaucoup de monde ! pic.twitter.com/1WkXTPiZAs

— Poireauxx (@Mr_Froustache) 19 de març de 2019