Sortit de Trentin, Riccardo Corradini es lo primièr estudiant universitari que seguisca lo programa d’escambi Erasmus+ dins la Lista de Gaza, en Palestina. Fa dos ans, aviá ja fach un sojorn d’escambi universitari en Cisjordania.
 
Corradini estúdia a l’Universitat de Siena, ont entamenèt fa tres ans un projècte de collaboracion amb l’Associacion de Cooperacion e Solidaritat (ACS) que trabalha amb d’universitats palestinianas. Quand l’universitat de Gaza anoncièt la dobertura d’una plaça per i estudiar pendent quatre meses dins un dels catòrze centres de l’enclava palestiniana, Corradini s’i inscriguèt còp sec. “Trantalhèri pas quitament un momenton”, çò diguèt l’estudiant que vòl aprene la medecina, lo servici sanitari d’urgéncia e la realitat del conflicte entre l’estat d’Israèl e Palestina. Es lo sol que s’i siá inscrich. “Me senti una persona privilegiada pr’amor que soi lo sol estudiant italian a estudiar e demorar en Gaza”, çò precisèt.
 
Corradini se vòl especializar en cirurgia d’urgéncia, e aquí o farà dins tres espitals. Aquel territòri patís una situacion de carestiá e de menaça guerrièra constanta, e doncas l’estudiant trentin afrontarà de situacions inimaginablas en Euròpa. Dempuèi març de 2018, mai de 250 abitants de Gaza son mòrts a causa de las balas de l’armada israeliana dins l’encastre de las protèstas frontalièras per defendre lo retorn dels refugiats e exigir la fin del blocatge. E mai environ 30 000 personas son nafradas dont un centenat amb d’amputacions, çò rapòrta Naiz.
 
En mai d’aquò, lo territòri patís un blocatge dempuèi 2007 qu’a causat un impacte grèu sus la situacion umanitària. Per quant a la santat, i a una manca de provesiments medicals e de potingas. Dins aquel sens, l’Organizacion Mondiala de la Santat (OMS) avertís de la penúria de 223 medicaments basics.
 
Es dins aqueste quadre que Corradini va trabalhar, dins un sistèma precari e amb solament setze oras per jorn d’electricitat.