La Cort Penala Internacionala per l’èx-Iogoslavia alonguèt dimècres passat la condemna de Radovan Karadžić a la perpetuitat. Lo tribunal de l’Aia considèra l’ex-cap de la Republica Sèrba de Bòsnia e Ercegovina colpable de crimes contra l'umanitat dins mai d’una vila bosniana, e a Srebrenica tanben, e considèra, de mai, qu'el n'es lo responsable. Karadžić, qu’a 73 ans, afrontava 11 acusacions, e en mai del genocidi a Srebrenica e dels crimes contra l'umanitat en Bòsnia, es estat considerat colpable dels delictes de persecucion, chaple, deportacion e assassinat pel sètge de Sarajevo. Per tot aquò, la cort internacionala lo condemnèt fa tres ans a 40 ans de preson. Ara ven d’alongar aquela senténcia a la perpetuitat. Es atal que se conclutz un dels procèsses pus seguits de la Cort Penala Internacionala.
 
Karadžić èra lo dirigent suprèm de l’autoproclamada Republica Sèrba, l’entitat sèrba de Bòsnia e Ercegovina. El teniá lo poder sus las fòrças paramilitaras sèrbas comandadas pel general Ratko Mladić dins lo quadre de la guèrra dels Balcans.
 
 
Lo genocidi d’Srebrenica
 
L’11 de julhet de 1995, durant la guèrra dels Balcans, los òmes comandats pel general Ratko Mladić entornegèron la vila d'Srebrenica, tota plena de refugiats, e i intrèron sens cap de sòrta d’oposicion del contingent neerlandés de Cascos Blaus de l’ÒNU. Las fòrças sèrbas i assassinèron mai de uèch mila òmes e gojats e n’expulsèron vint mila personas.
 
Per aquel masèl, lo mai grand d’Euròpa après la Segonda Guèrra Mondiala, se jutgèt al Tribunal Penal Internacional e se condemnèt per crimes de guèrra lo president de Serbia Slobodan Milošević (que moriguèt en preson en 2006), lo president dels sèrbes de Bòsnia, Radovan Karadžić, aquestes dos darrièrs coma instigators, e mai lo general Ratko Mladić, coma executor.
 
Mas en aquel chaple, i aguèt tanben l’abandon de la comunautat internacionala: tant per la negligéncia dels Cascos Blaus desplegats sus plaça coma per çò que lo revelèt lo jornal The Guardian: çò es que la casuda d’Srebrenica fasiá partida de l’estrategia del Reialme Unit, de França, dels Estats Units e quitament de l’ÒNU per obténer la patz a quin prètz que foguèsse, en liurant la vila a Mladić.