CAPÇALERA PAIS INVISIBLE

Actualitats

InternacionalPoliticaSocietat

Lo Conselh Electoral espanhòl enebís tot simbòl de sosten als presonièrs politics catalans

La polícia es intrada dins las bastissas publicas e las escòlas per ne levard los ribans jaunes. L’enebicion arriba en seguida d’una demanda del partit Ciutadans

Lo Conselh Electoral de l’estat espanhòl a enebit tot simbòl de sosten als presonièrs politics catalans dins los edificis e mèdias publics. O a fach en seguida del partit espanholista Ciutadans, que considèra que s’agís de simbologia partisana que pòt influir sul vòte dins las eleccions legislativas de l’estat espanhòl del 28 d’abril que ven.
 
D’efièch, lo govèrn espanhòl demandèt a la polícia catalana, los Mòssis d’Esquadra, que levèsson eles los ribans. E dins aquel sens d’agents intrèron dins las escòlas per retirar totes los ribans jaunes del temps que la television de Barcelona, Betevé, se vesiá obligada de levar l’etiqueta “presonièrs politics” de son sit web d’informacions.
 
Quand lo Conselh Electoral prononcièt son interdiccion, lo president catalan en foncions, Quim Torra, de Catalonha refusèt de retirar la bandeiròla del Palais de la Generalitat. Puèi, en seguida de la demanda del mediator de Catalonha, Rafel Ribó, cambièt la bandeiròla per una autra sens riban jaune. Enfin, foguèt forçat de la levar, e ara en sa plaça n’i a una que revendica la “libertat d’opinion e d’expression” en mençonant l’article 19 de la Declaracion Universala dels Dreches Umans.
 

 
La bandeiròla originala del Palais de la Generalitat ara es penjada suls balcons d’un domicili privat d’un bastiment de la meteissa plaça.
 

 
De policièrs trason los ribans de las escòlas
 
En seguida del mandat del Conselh Electoral espanhòl, d’agents de la polícia catalana, los Mòssis d’Esquadra, intrèron dins mai d’una escòla per verificar que i aviá de ribans jaunes e los en traire. Escafèron quitament de pinturas muralas realizadas pels escolans.
 


 Aquel fach a causat l’indignacion màger d’escolans e ensenhaires e sustot dels sindicats. Mai d’un professor an pres d’imatges en vidèo e las an difondudas suls rets socials.
 
Los mòssis penetrèron tanben quatre departaments de la Generalitat, per retirar quitament de fuèlhs blancs ont qualques salariats avián escrich dessús l’adjectiu jaune.
 

 
Qualques municipalitats an remplaçat las bandeiròlas de lors bastissas per d'autras d'engenhosas:
 

 

  
Lo ministre de l’educacion de la Generalitat de Catalonha a manifestat son sosten als ensenhaires e a criticat las autoritats espanhòlas qu’an “atemptat contra la libertat d’expression”.
 

La batalha dels ribans jaunes
 
Dempuèi octòbre de 2017, lo riban jaune es vengut simbolic per reclamar la libertat dels presonièrs politics en Catalonha e Aran. Fòrça ciutadans ne pòrtan un sus lor vestit del temps que de ribans auriòls son afichats als balcons, a las fenèstras e per las carrièras de tot lo país. Al començament de l’estiu passat, de grops espanholistas, mai que mai restacats a l’ultradrecha, comencèron de traire de ribans jaunes e quitament d’agarrir los ciutadans que n’arboravan.
 
Lo partit de drecha espanholista Ciutadans protèsta contra aqueles ribans. Pretendon que son de simbòls politics qu’ocupan l’espaci public, e encoratjan lors militants a retirar los que serián trobats per carrièras. An quitament pagat un avion publicitari que subrevòla las platjas del país en demandant al mond que lèven los ribans auriòls.
 
 
 


abonar los amics de Jornalet

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Pitaluga
2.

Coma i a las republicas bananièras, i a las monarquias bananièras.
Lo partit faissista VOX pòt intrar amb fòrça al parlament espanhòl (se parla d'un trentenat de deputats): logic. Se fa pas d'anticatalanisme primari a gratis.

  • 5
  • 0
francesc palma
1.

Los Drets de Home - l'ONU 1948 - estan per damunt de las constitucions tercermundistas que los reconeisson pas.

  • 1
  • 0

Escriu un comentari sus aqueste article